Aqtóbede káýap pisirmek bolǵan júkti áıel kúıikten kóz jumdy
AQTÓBE. QazAqparat - Aqtóbeniń Keńqııaq aýylynda qaıǵyly jaǵdaı tirkeldi. Otqa kerosın quıyp, káýap pisirmek bolǵan otbasynda júkti áıel kóz jumdy, dep habarlaıdy QazAqparat tilshisi.
Keńqııaq aýyly turǵyndarynyń aıtýynsha, káýap pisirmek bolǵan otaǵasy ot tutatyp, janbaǵan soń 5 lıtr «baklajkada» turǵan janar-jaǵarmaıdy otqa quıyp jiberedi. Sol kezde ot lap etip, janyp jatqan «baklajkadaǵy» benzın júkti áıeldiń ústine tógiledi. Erli-zaıyptylar kúıik shalyp, aýrýhanaǵa tústi.
Dárigerler júkti áıelge ota jasaǵanymen, ana men balany aman alyp qalý múmkin bolmady. Al denesiniń teń jartysyn kúıik shalǵan aýyl turǵyny qazir em qabyldap jatyr.
«Kúıik shalǵan er adam aýrýhanada em alyp jatyr. Jaǵdaıy birqalypty, ortasha. Naýqas jalpy palataǵa aýystyryldy»,- dedi Aqtóbe oblystyq densaýlyq saqtaý basqarmasynyń bas mamany Almagúl Serjanova.
