Aqtóbede qatty jelden mekteptiń qasbetin qaptaǵan qańyltyr ushyp jatyr
AQTÓBE. QazAqparat - Aqtóbe oblysy Muǵaljar aýdanynda orta mekteptiń qabyrǵasyn qaptaǵan qurylys materıaly ushyp jatyr. Bir jyl buryn jóndelgen mektepti merdiger mekeme qalpyna keltiredi, dep habarlaıdy QazAqparat tilshisi.
Aqtóbede jel kúsheıip, tótenshe jaǵdaılar qyzmeti turǵyndarǵa habarlama taratyp jatyr. Boljam boıynsha, búgin jeldiń jyldamdyǵy sekýndyna 15-20, keı jerlerde 30 metrge jetedi. Qazirgi kúni Muǵaljar orta mektebiniń qasbetin qaptaǵan materıal ushyp ketti. Bul bilim ordasy 2016 jyly jóndeýden ótken bolatyn.
«Qatty jeldiń saldarynan Muǵaljar orta mektebiniń qasbetinde qańyltyrlar ushyp ketti. Mektep 2016 jyly jóndelip, paıdalanýǵa berildi. Merdiger mekemege habar berildi. Kepildik ýaqyty bitken joq. Sondyqtan jel basylǵan soń qalpyna keltirý jumystaryn júrgizedi. Shynyn aıtqanda, Muǵaljar aýyldyq okrýginde jel qatty. Aqtóbe qalasynda jeldiń jyldamdyǵy sekýndyna 30 metr bolsa, ol jaqta 35-ke jetedi. Sondyqtan aýyl adamdardy úıleriniń tóbesin proflıstpen qaptamaıdy», - dedi Muǵaljar aýdandyq bilim bóliminiń basshysy Álimjan Qorǵanbaı.
Aıta keteıik, Aqtóbe oblystyq tótenshe jaǵdaılar departamenti erteń de jeldiń jyldamdyǵy 30 m/s jetetinin habarlady. Áleýmettik jeli arqyly alys jolǵa shyqpaý, qurylysty toqtatýǵa keńes berildi.
«Keshe túndi shaǵyn «GAZel» isten shyǵyp, «QazAvtoJol» UK» AQ kómegimen jolaýshylardyń barlyǵy jylytý beketterine jetkizildi. Keıin olar saparyn jalǵastyrdy. Eshkim japa shekken joq. Úsik shalǵan adamdar týraly bizge habarlama túsken emes», - dedi Aqtóbe oblystyq TJD bastyǵynyń orynbasary Qaırat Qasym.
