Aqtóbede qatty jeldiń saldarynan birneshe baǵyttaǵy jol jabyldy
AQTÓBE. KAZINFORM – Respýblıkalyq jáne oblystyq mańyzy bar joldarda qazir polıtsııa qyzmetkerleri kezekshilikte tur. Kóbinde júk jáne avtobýstarǵa shekteý qoıyldy. Sonymen birge qaladaǵy ortalyq saıabaqtaǵy Tý ýaqytsha tómen túsirildi.
Aqtóbe oblystyq PD jáne oblystyq TJD óńirdegi birneshe joldyń ýaqytsha jabylǵanyn habarlady. Qazirgi kezde jel kúsheıip, dalada boran soǵyp tur. Saldarynan Aqtóbe – Astrahan avtojolynyń Aqtóbe qalasynan Qandyaǵash qalasyna deıingi aralyq júk jáne qoǵamdyq kólikter úshin jabyq. Al Qandyaǵashtan Atyraý oblysynyń shekarasyna deıingi aýmaqta kóliktiń barlyq túri júre almaıdy. Sonymen birge Samara – Shymkent tasjolynyń Aqtóbe qalasynan Qarabutaq aýylyna deıingi aralyq qaýipti sanalyp, júk kóligi men avtobýstarynyń qozǵalysy shekteldi. Sonymen birge Aqtóbe – Bolǵarka avtojoly ýaqytsha jabyldy.
Aqtóbe oblystyq TJD baspasóz qyzmetiniń habarlaýynsha, eger kún raıy ózgerse joldy túnde qaıta ashýy múmkin. Qazirgi kezde Aqtóbedegi soltústik aınalma jol, Pokrovka-Temir-Embi, Aqtóbe-Bolgarka-Shubarqudyq jáne Qandyaǵash qalasynan Shalqar qalasyna deıingi aralyq tolyq jabyldy. Jergilikti mańyzy bar Dóń-Badamsha-Aqtóbe-Orsk tasjolynyń Hromtaý qalasynan Aqtóbe-Orsk tasjolyna deıingi aralyqqa shekteý qoıyldy. Al Aqtóbe qalalyq ákimdigi ortalyqtaǵy eń úlken týdy ýaqytsha túsirýge sheshim qabyldaǵan.
- Aqtóbede jeldiń kúsheıýine baılanysty 12 shaǵyn aýdandaǵy aınalma jolda ornalasqan jáne Tuńǵysh prezıdent atyndaǵy ortalyq saıabaqtaǵy memlekettik Tý tómen túsirildi. Qatty jeldiń saldarynan tý jyrtylyp qalmas úshin osyndaı sheshim qabyldandy. Jel basylǵan soń qaıta ornyna kóteriledi,- dep habarlady ákimdik.
Aıta keteıik, Aqtóbedegi mektepterde sabaq qalypty ótip jatyr. Aıazǵa baılanysty Qazaqstannyń birneshe óńirinde ekinshi aýysymdaǵy mektep oqýshylary qashyqtan oqytý formatyna aýystyryldy.
