Aqtóbede qatty jeldiń saldarynan birneshe aýylda jaryq óshti
AQTÓBE. KAZINFORM - Jaryq Alǵa aýdanynyń birneshe aýylynda sóndi. Qazirgi kezde jóndeý jumystary atqarylyp jatyr.
Aqtóbe oblysy Alǵa aýdanynyń ákimi Aslanbek Shúıinshalıevtiń aıtýynsha, toǵyz aýylda jaryq joq.
- 5-qańtar saǵat 16:00-den bastap aýdanda aýa raıy kúrt buzyldy. Qar aralas jańbyr jaýdy, jeldiń ekipini keı jerde sekýndyna 23 metrge deıin jetti. Aýdannyń keıbir aýyldarynda jaryq óshti. Atap aıtar bolsaq, Nurbulaq, Sambaı, Amangeldi, Qaraqudyq, Kóktoǵaı, Tikqaıyń, Qaraqobda, Úshqudyq jáne Marjanbulaq aýylynyń shyǵys bóligi. Aýa raıynyń qolaýsyzdyǵyna qaramastan brıgadalar jóndeý jumysyn júrgizip jatyr,- dep habarlady Alǵa aýjanynyń ákimi resmı paraqshada.
Aıta keteıik, Aqtóbede respýblıkalyq baǵyttaǵy barlyq tasjol ýaqytsha jabyldy. Óńirde jel kúsheıip, qar aralas jańbyr jaýyp tur.