Aqtóbede qatty daýyl kezinde munara qulap, úsh adam zardap shekti
AQTÓBE. KAZINFORM — Oqıǵa Baıǵanın aýdanynyń ortalyǵy Qaraýylkeldi aýylynda boldy. Sonymen birge birneshe úıdiń shatyry ushyp ketti. Jergilikti mańyzǵa ıe tótenshe jaǵdaı jarııalandy.
Aqtóbe oblysy ákiminiń baspasóz qyzmetiniń habarlaýynsha, baılanys munarasy dúkenniń ústine qulaǵan. Saldarynan úsh adam zardap shegip, aýrýhanaǵa jetkizildi. Qazirgi kezde olardyń densaýlyǵy qalypty. Olar túrli jaraqat alǵan jáne denesiniń birneshe jerin jyryp ketken. Oqıǵa ornynda Tótenshe jaǵdaılar departamentiniń qyzmetkerleri avarııalyq-qutqarý jumystaryn júrgizdi.
— Qatty jeldiń saldarynan birneshe nysan zaqymdandy. Óńir basshysy Ashat Shaharovtyń tapsyrmasy boıynsha qajetti is-sharalardy úılestirý maqsatynda oblys ákiminiń orynbasary Ǵalymjan Eleýovtyń jetekshiligimen tótenshe jaǵdaılar jónindegi komıssııa quryldy. Qazirgi ýaqytta nysandarǵa keltirilgen zalaldy baǵalaý jumystary júrgizilip jatyr. Aýdan ortalyǵynda elektr energııasy men uıaly baılanys qyzmetin qalpyna keltirý úshin avarııalyq brıgadalar jumys istep jatyr. Tekserý qorytyndysy boıynsha jergilikti aýqymdaǵy tótenshe jaǵdaı jarııalaý týraly sheshim qabyldanady, — dep habarlady oblys ákiminiń baspasóz qyzmeti.
Qazir ınfraqurylymdy qalpyna keltirýge jaýapty mekemeler kúsheıtilgen tártipte jumys istep jatyr. Jergilikti atqarýshy organ ókilderi oqıǵa saldaryn joıý jáne zardap shekken turǵyndarǵa kómek kórsetýdi yjdaǵattamaq.
Eske salsaq, maýsym aıynda Aqtóbede qatty daýyl bolyp, birneshe aǵash qulady, turǵyn úılerdiń shatyry ushty.
