Aqtóbede qaterli isikke shaldyqqan naýqastar dárini ýaqytyly jetkizýdi surady
AQTÓBE. QazAqparat - Aqtóbelikter búgin dárigerlermen betpe-bet kezdesýge múmkindik aldy, dep habarlaıdy QazAqparat tilshisi.
Aqtóbede Dúnıejúzilik obyrǵa qarsy kúres kúninde dárigerlermen kezdesý ótkizildi. Qazirgi kúni óńirde qaterli isik anyqtalǵan naýqastar birden Aqtóbe oblystyq aýrýhanasyna jiberiledi. Bul naýqastardyń bir emhanadan, ekinshi aýrýhanaǵa baryp, ýaqyt joǵaltpaýyna septigin tıgizedi. Onkologtardyń qabyldaǵan bul sheshimi boıynsha arnaıy marshrýt ázirlendi.
«Onkologııalyq aýrý anyqtalǵan kez kelgen adam Aqtóbe oblystyq medıtsına ortalyǵyna jiberiledi. Ol jerde 3-7 kún aralyǵynda MRT, KT jasalyp, tekserý men analızderdi zerthanaǵa jiberý jalǵasady. Aýdandardan kelgen naýqastar úıine qaıta oralyp, joldama ákelý máselesimen júrmeıdi. Bul jumysty arnaıy dárigerge júktelgen. Bul marshrýtty buzǵan adamdar arnaıy jaýapkershilikke tartylady. Emniń bári tegin júrgiziledi»,- dedi Aqtóbe oblystyq densaýlyq saqtaý basqarmasy basshysynyń orynbasary Svetlana Esenamanova.
Aqtóbe oblysy boıynsha obyr dertine shaldyqqan adamdar sany artty. Ótken jyly 1600-den astam adamnan obyr derti anyqtaldy.
Marat Ospanov atyndaǵy Batys Qazaqstan memlekettik medıtsınalyq ýnıversıteti, onkologııa kafedrasynyń meńgerýshisi Árip Qoıshybaevtyń aıtýynsha, ókpe, sút bezi, asqazan, teri aýrýynyń qaterli isigi jıi tirkelgen. Ásirese, Aqtóbe qalasy, Qarǵaly, Mártók, Muǵaljar, Hromtaý aýdandarynan jıi anyqtaldy. Eń mańyzdyǵysy - qaterli isikti erte anyqtaý. Sebebi, dert neǵurlym erte anyqtalsa, ony emdeý múmkindigi joǵarylaıdy. Óńirde osy baǵytta medıtsınalyq qyzmetkerler arnaıy kýrstarǵa jiberildi. Medıtsınalyq ýnıversıtet mamandary aýdan, aýyldan kelgen dárigerlerge dertti anyqtaý joldaryn úıretti. Jıynǵa qatysqan naýqastar emge qajetti dári-dármektiń ýaqytyly jetkizilmegenine alańdady.
«Meniń anamnan 2016 jyly qaterli isik anyqtaldy. Sút bezi dertiniń ІІ deńgeıi boldy. Al 2017 jyldyń jazynda ókpe metastazasy belgili boldy. Alǵashqy belgi anyqtalǵan kezde jan-jaqqa habarlasyp, surap, zertteý júrgizdik. Ótken aptada ǵana dárigermen kezdesip, dáriniń jetkilikti ekenin bildik. Al búgin 5 aqpan kúni bizge qajetti dáriniń jetkizilmeýi múmkin ekenin bildik. Dári tapshylyǵyn joıýdy suraımyz»,- dedi aqtóbelik turǵyn Laýra Myrzabaeva.
Al dárigerler onkologııalyq aýrýlardy emdeýge qajetti dáriniń bir bóligi áli jetkizilmegenin rastady. Kezdesý kezinde sút bezi dertine shaldyqqan Saltanat Abdýllına aldymen emhanalardaǵy dárigerlerdiń biliktiligin arttyrý qajet ekenin aıtty. «2017 jyldyń qazan aıynda obyr derti anyqtaldy. Bir jyl buryn ýchaskelik dárigerler baryp, omyraýymda ózgeris bar ekenin aıtqanymda olar mán bermedi. Al ótken jyly mammologqa joldama berýdi suradym. Anyqtaldy, em júrgizý bastaldy. Sondyqtan bul jerde dárigerlerdiń biliktiligin arttyrýdy suraımyn»,- dedi ol.
