Aqtóbede kásipkerlerge eki aptalyq azyq-túlik qoryn jasaqtaý tapsyryldy
AQTÓBE. KAZINFORM – Joldar jabylǵan kezde de baǵa kóterilmeýi kerek. Al jetkizý kezinde tek kólik emes, qajet bolsa temirjol tasymalyn qoldaný usynyldy.
Aqtóbe oblysynda azyq-túlik qaýipsizdigi men ónimdi turaqty jetkizý turǵysynda jıyn ótti. Oǵan saýda jelileri men iri bıznes ókilderi qatysty. Qazirgi kezde taýardyń kóbi tasjol arqyly jetkiziledi. Al respýblıkalyq jáne oblystyq mańyzy bar joldar qystyń borandy kúni jıi jabylady. Bul azyq-túliktiń 2-5 kún keshigip jetýine ákep soǵýy múmkin. Jıynda oblys ákiminiń orynbasary Ǵalymjan Eleýov ásirese áleýmettik mańyzy bar taýarǵa basymdyq berý kerek ekenin eskertti.
– Jıyn barysynda jumystyń negizgi baǵyttary aıqyndaldy. Eń aldymen jetkilikti azyq-túlik qoryn qalyptastyrý máselesi kóterildi. Saýda jelilerine birinshi kezektegi qajetti taýarlar – un, kúnbaǵys maıy, túrli jarma, qant jáne kókónister. Keminde 15–20 kúnge jetetin «qaýipsizdik qorynyń» bolýyn qamtamasyz etý tapsyryldy. Ekinshi basymdyq logıstıkalyq táýekelderdi tómendetýge berildi. Qolaısyz aýa raıy uzaqqa sozylǵan jaǵdaıda avtokólikten temirjol kóligine kóshý, sonymen birge balamaly jetkizý syzbalaryn pysyqtaý usynyldy. Al qoımalarda rezervtik qýat kózderi bolýy shart. Bul ónimdi saqtaý kezinde turaqty temperatýralyq rejımdi qamtamasyz etýge septigin tıgizedi, - dep habarlady Aqtóbe oblysy ákiminiń baspasóz qyzmeti.
Endi saýda jelileri oblystyq kásipkerlik jáne ındýstrııalyq-ınnovatsııalyq damý basqarmasyna apta saıyn qoımada qansha ónim qalǵanyn habarlap otyrýy kerek. Eger joldar jabylsa azyq-túlik tıelgen júk kóliginiń qaı mańda turǵanyn TJD jáne quqyq qorǵaý organdary bilýi tıis. Sonymen birge aldyn ala kelisim boıynsha áleýmettik mańyzy bar azyq-túlik taýarlaryna belgilengen shekti saýda ústemesi úshin 7%-dan joǵary qospaý mindetteldi. Al qoımalarda dızel-generatorlar men qar tazalaý tehnıkasy daıyn turýy tıis.
Aıta keteıik, elimizde azyq-túlik taýarlarynyń baǵasy ótken jyldyń deńgeıinde saqtalǵan. Bıyl 4 qańtardan bastap áleýmettik mańyzy bar azyq-túlik taýarlarynyń ýaqytsha keńeıtilgen tizbesi engizildi.