Aqtóbede kásipker 11 mln lıtrden astam pesh otynyn zańsyz satqan
ASTANA. KAZINFORM — Aqtóbe oblysynda «Kazenergy» jeke kásipkerliginiń basshysy zańsyz kásipkerlikpen aınalysqany jáne qylmystyq jolmen alynǵan aqshany zańdastyrǵany úshin 3 jyl 9 aıǵa bas bostandyǵynan aıyryldy.
Tergeý derekterine sáıkes, sottalǵan adam aýmaǵy 10 myń sharshy metr óndiristik bazada qaýipti qaldyqtardy zańsyz óńdeýdi jáne pesh otynyn óndirýdi uıymdastyrǵan.
Shıkizat retinde paıdalanylǵan maılar, munaı shlamdary jáne quramynda munaı bar ózge de qaldyqtar qoldanylǵan. Olar naftamen aralastyrylyp, aınalym ádisimen óńdelgen.
Alaıda kásipkerge qaýipti qaldyqtardy óńdeýge, zalalsyzdandyrýǵa jáne kádege jaratýǵa qajetti lıtsenzııa men ekologııalyq ruqsat berilmegen.
Nátıjesinde 11 mıllıon lıtrden astam pesh otyny satylyp, qylmystyq jolmen 778 mıllıon teńge tabys alynǵan.
Sonymen qatar sot onyń múlkin, sonyń ishinde óndiristik nysanyn, avtokólikterin jáne bank shottaryndaǵy aqshasyn tárkiledi.
Sot úkimi zańdy kúshine engen joq.
Aıta ketý kerek, óndirilgen pesh otyny ulttyq sapa standarttaryna saı kelmegen ári quramynda zııandy hımııalyq zattar bolǵan.
Mundaı otyndy turmystyq jáne ónerkásiptik qazandyqtar men peshterde jaǵý kezinde aýaǵa ýly zattar taraýy yqtımal edi. Bul óńir turǵyndarynyń tynys alý júıesi men densaýlyǵyna qaýip tóndirgen.
Aıta ketelik Taraz áýejaıy avıaotyndy qymbat satqany úshin aıyppul tóleıtini týraly jazǵan edik.
