Aqtóbede kásipkerlerge qaraqshylyq shabýyl jasaǵandar ustaldy
AQTÓBE. QazAqparat - Aqtóbe qalasynda zergerlik buıym satatyndardyń páterine shabýyl jasaǵan úsh kúdikti ustaldy. Shabýyl jasaýshylar kásippen aınalysqan reseılik azamattardy tapanshamen qorqytyp, aqsha men baǵaly zattar saqtalǵan seıfti talap etken, dep habarlaıdy QazAqparat tilshisi.
Betperde kıip, qarýlanǵan úsh adam ekinshi qabatqa balkon arqyly kirip, keıin páter ishindegi úsh kásipkerdi qorqytqan. Bireýi Qazaqstan, ekeýi Reseı azamaty. Shabýyl jasaǵandar olardy tapanshamen qorqytyp, aqsha men baǵaly zattarǵa toly seıfti taýyp berýdi suraǵan.
«Aqtóbe qalasynyń Іshki ister basqarmasy men oblystyq ІІD krımınaldyq polıtsııa qyzmetkerleri oqıǵa ornyna jedel jetti. Kúdiktiler polıtsııaǵa oq atyp, qarsylyq kórsetti. Shabýyl jasaǵandardy ustaý operatsııasy kezinde jaralanǵandar men qaza bolǵandar tirkelgen joq. Nátıjesinde Aqtóbe qalasynyń úsh azamaty ustaldy. Olar urlyq, tonaý, qaraqshylyq, adam densaýlyǵyna qasaqana zııan keltirgenderi úshin buryn isti bolǵan eken. Ustalǵandardyń taǵy 6 aýyr qylmysqa qatysy bar ekeni anyqtalyp otyr»,- dep habarlady oblystyq ІІD baspasóz qyzmeti.
Aıta keteıik, shabýyl jasaǵandardan atys qarýy men betperde, baǵaly zat ıelerin býyp, aýyzdaryn bekitýge arnalǵan skoch tárkilendi. Oblystyq ІІD basshylyǵy jedel operatsııa kezinde qyzmetin adal atqarǵan polıtsııa qyzmetkerlerin yntalandyryp, ІІM marapatqa usyndy.
