Aqtóbede kásipkerlerdiń jumysyna ákimdik qyzmetkerleri de kedergi keltirgen
Aqtóbe oblysynyń prokýratýrasy Memlekettik qyzmet isteri jáne sybaılas jemqorlyqqqa qarsy is-qımyl departamenti, Kásipkerler palatasymen birlese aýdan ákimdigine, memlekettik kirister, tutynýshylardyń quqyqtaryn qorǵaý bólimderine tekserý júrgizdi. Bıznesti damytýǵa kedergi keltirip otyrǵandardyń kóbi ákimdik qyzmetkerleri.
«Hromtaý qalasynyń bas jospary eki ret ózgergen eken. Sol kezde bızneske arnalǵan 30 jer telimi tizimnen shyǵyp qaldy. Nátıjesinde 7 kásipkerdiń jer telimin qaıtaryp bergeni anyqtaldy. Qaıtarylǵan jerdiń ornyna ózge jer telimin usynýy tıis ákimdik tek bir kásipkerdiń ótinishin qanaǵattandyrǵan. Sonymen qatar, Jer Kodeksine sáıkes jer tek aýktsıon arqyly berilýi tıis. Alaıda Hromtaý qalasynyń ákimdigi jerdi irikteý arqyly bólip, keıbir adamdarǵa basymdyq bergen. Jer ala almaı júrgender de, birneshe ret jer telimin alyp, paıdaǵa kenelgender de tekserý kezinde anyqtaldy»,- dep habarlady oblystyq prokýratýranyń baspasóz qyzmeti.
Al Hromtaý aýdandyq ishki ister departamentiniń qyzmetkerleri 44 kásipkerdi zańsyz ákimshilik jaýapqa tartqan. Prokýratýra keıin bul sheshimderdiń kúshin joıdy. Sonymen qatar, aýdan kásipkerleri syrtqy jarnama úshin shyǵynǵa batqan. Máselen, «Donskaıa neftebaza» AQ-y 4 myń teńgelik jarnamanyń ornyna 38 myń teńge tólep, negizsiz qarjy shyǵyndaǵan.
«Eki jyl buryn «SAK grýpp» JShS-i Bógetsaı orta mektebine kúrdeli jóndeý jumystaryn júrgizgen. Al aýdandyq bilim bólimi bar jumysty bitirip bergen qurylys kompanııasyna 11 mıllıon teńgeni áli bermeı otyr. Hromtaý aýdany kásipkerleriniń osy jáne ózge de máseleleri Aqtóbe oblysy prokýrorynyń baqylaýyna alynyp, zańsyzdyqtar joıyldy. Endi jer tek Jer Kodeksine saı beriledi. Bas jospardaǵy ózgeris kezinde jerinen aıyrylǵan kásipkerlerge basqa jer telimi usynylady. Mundaı tekserý barlyq aýdanda júrgiziletin boldy»,- dep habarlady oblys prokýrorynyń baspasóz qyzmeti.