Aqtóbede kásipkerler sany ósti

AQTÓBE. QazAqparat – Aqtóbede shaǵyn jáne orta bıznes sýbektisiniń sany 2,7 paıyzǵa artty, dep habarlaıdy QazAqparat tilshisi.

Óńirde 60 myńǵa jýyq shaǵyn jáne orta bıznes sýbektisi bar. Bul ótken jylmen salystyrǵanda 2,7 paıyzǵa artyq. Kóbi óz qyzmetin jalǵastyryp jatyr. Alaıda oblystyq bas sanıtarlyq dárigerdiń qaýlysyna sáıkes birqatar shaǵyn jáne orta bıznes sýbektisi qazir óz qyzmetin toqtatty. Olar: meıramhana, oıyn-saýyq ortalyqtary ishindegi balalardyń oıyn alańy, karaoke, bılıard, kompıýter klýbtar.

«Oblysta shaǵyn jáne orta bıznesti qoldaý úshin birqatar baǵdarlama iske asyryldy. «Bıznestiń jol kartasy» baǵdarlamasy aıasynda 3,3 mıllıard teńge bólindi. Ótken jyly 2,4 mıllıard teńge berilip, ıgerilgen edi. Qazirgi kúni 492 joba qoldaý tapty. Sonymen birge baǵdarlamalarǵa ózgertýler engizildi. Paıyzdyq ústemaqy 6 paıyzdy qurady. Sýbsıdııa men kepildendirý de nazardan tys qalmady. Óńir kásipkerleri úshin bul úlken kómek»,- dedi oblystyq kásipkerlik basqarmasynyń basshysy Nurhan Tileýmuratov.

Al «Qarapaıym zattar ekonomıkasy» baǵdarlamasy aıasynda ótken jyly 83 joba qoldaý tapty. Búginde 110 joba maquldandy. «Eńbek» baǵdarlamasy boıynsha 960 joba iske asyrylyp jatyr.