Aqtóbede kásipkerler men fermerler bos jatqan jerdi memleketke qaıtardy

AQTÓBE. QazAqparat – Aqtóbe oblysynyń prokýrorlary óńirde 736 myń gektardan astam jerdiń kádege aspaı, bos jatqanyn anyqtady. Sonymen birge kásipkerlik maqsattaǵy jer telimderi de keri qaıtaryldy, dep habarlaıdy QazAqparat tilshisi.

Oblys prokýratýrasy paıdalanylmaǵan jerlerdi anyqtaý boıynsha taldaý júrgizdi. Bıyl 736 531 ga kóleminde jer anyqtaldy. Shamamen onyń quny 283,2 mln teńgeden asady. Qazirgi kezde 62 myń gektarǵa jýyq jer memleket menshigine qaıtaryldy. Al 110 myń gektar jer ýchaskesi ıgerilip, qaıta aınalymǵa tartyldy. Jaıylymdy jumys paıdalanbaı otyrǵan sharýashylyqtar da bar.

«Aqtóbe oblysy Martók aýdanynda sharýa qojalyǵyna jalpy kólemi 4 800 ga jer jaıylymǵa berilgen. Al memlekettik organdarynyń málimetterine súıensek, qojalyq atynda eshqandaı da mal basy tirkelmegeni jáne egin egý jumystary júrgizilmegen. Osyǵan uqsas jaǵdaı 31 sharýashylyqta anyqtaldy. Olardyń ıgiliginde 13 653 ga quraıtyn jer ýchaskeleri bolǵan», - dep habarlady oblystyq prokýratýranyń baspasóz qyzmeti.

Sonymen birge oblysta kásipkerlik maqsatta alyp, paıdalanylmaı jatqan 58 jer telimi bar. Onyń aýdany 21 820 ga quraıdy. Qazirgi kezde 17 myń gektardan astamy keri qaıtaryldy.

«2016 jyly hromtaýlyq kásipkerlerge 0,0312 ga jáne 0,0015 ga jer ýchaskeleri berilgen. Alaıda olar osy ýaqytqa deıin tıisinshe paıdalanylmaǵan. Prokýrorlyq qadaǵalaý aktisi boıynsha atalǵan jer ýchaskeleri memleket qoryna qaıtaryldy», — habarlady oblystyq prokýratýranyń baspasóz qyzmeti.