Aqtóbede kásipkerden 1,7 mln teńge para alǵan tergeýshi 3 jylǵa sottaldy

NUR-SULTAN. QazAqparat - Ekonomıkalyq tergeý qyzmetiniń asa mańyzdy ister jónindegi aǵa tergeýshisi 3 jylǵa bas bostandyǵynan aıyryldy, dep habarlaıdy QazAqparat QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń baspasóz qyzmetine silteme jasap.

Sybaılas jemqorlyqqa qarsy is-qımyl ulttyq bıýrosynyń Aqtóbe oblysy boıynsha departamenti oblystyq memlekettik kirister departamenti ekonomıkalyq tergeý qyzmetiniń asa mańyzdy ister jónindegi aǵa tergeýshisi B. Mereıge qatysty sotqa deıingi tergeýdi aıaqtaǵan bolatyn. Aıta keteıik, tergeýshi zańsyz kásipkerlik týraly qylmystyq isti toqtatý úshin jeke fırmanyń basshysynan 1,7 mln teńge para alǵan.

«Aqtóbe qalasynyń №2 soty B.Mereıdi para alý faktisi boıynsha kináli dep tanydy jáne ómir boıyna memlekettik qyzmette jumys isteý quqyǵynan aıyrdy. Ol sot úkimimen 3 jylǵa sottaldy» delingen habarlamada.

Tergeýshi sondaı-aq «3-sanatty biliktilik synyby» arnaıy ataǵynan da aıyryldy.