Aqtóbede kásip ashýshylarǵa 200 mıllıon teńge nesıe berildi

AQTÓBE. QazAqparat - Aqtóbede «Halyq qaýipsizdigin qamtamasyz etý» jobasy aıasynda jumys júrip jatyr. Bir aıda kásip ashý úshin 200 mıllıon teńgeden astam nesıe berildi, dep habarlaıdy QazAqparat tilshisi.

Aqtóbede iske asyrylyp jatqan «Halyq qaýipsizdigin qamtamasyz etý» jobasy 70 myń adamdy qamtydy. Aýyl men aýdan turǵyndaryn jumysqa ornalastyrý, áleýmettik suraqtardyń sheshimin tabý, kásipkerlik negizderine oqytyp, bıznes bastaýǵa nesıe berý basty nazarda boldy. Sonymen qatar, teologtar men sarapshylar jat aǵym jeteginde júrgen 300-den astam adammen kezdesý ótkizdi. Bul jumystar Áıteke bı, Hromtaý, Muǵaljar, Temir, Mártók, Qarǵaly, Baıǵanın, Shalqar aýdandarynda júrdi.

«Jobanyń «Bıznes ortany damytý» baǵyty boıynsha 600-den astam adam semınar, trenıngke qatysty. Al «Bıznes Bastaý» kýrsy kezinde kásipkerlik negizderin oqyǵan aýyl, aýdan turǵyndary jumysqa kiristi. Barlyǵy 47 joba maquldandy. Shaǵyn jáne orta kásipti qolǵa alǵan adamdarǵa 270 mıllıon teńge kómek berildi. «Áleýmettik máselelerdi sheshý» baǵyty boıynsha 1500-den astam adamǵa kómek berildi. «Jaqynyńa kómektes» qaıyrymdylyq aktsııasy kezinde muqtaj jandarǵa 3 mıllıon teńgeden astam qarjylaı kómek berildi»,- dep aqparat taratty «Aqtóbe aqparat» ortalyǵy.

Otbasylyq tabysy az, qarjylaı kómekke muqtaj adamdarǵa «Órleý» memlekettik baǵdarlamasy aıasynda kómek berildi. Barlyǵy 452 otbasy baǵdarlamanyń múmkindikteri men erjeleri túsindirildi. Aqtóbe oblysy boıynsha 639 jumyssyzǵa memlekettik baǵdarlamalar men jumysqa ornalasý joldary aıtyldy. Joba aıasynda 144 adam eńbekke aralasty.

«Dárigerler 39 ota jasap, 8 myńnan astam turǵynǵa medıtsınalyq kómek berdi.

Aqparattyq jumystar aıasynda QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Joldaýy, «100 naqty qadam» Ult jospary, «Bolashaqqa baǵdar: rýhanı jańǵyrý» maqalasy túsindirildi. Joba aıasynda 70 myńǵa jýyq adam qamtylyp, 1700 shara ótkizildi»,- dep habarlady «Aqtóbe aqparat».