Aqtóbede qashyqtan oqytý úshin 3 myń noýtbýk satyp alynady

AQTÓBE. QazAqparat - Aqtóbede áleýmettik jaǵynan osal toptaǵy otbasylardyń balalaryn qashyqtan oqytý úshin qosymsha 3 myń noýtbýk satyp alynady. Oǵan bıýdjetten 480 mıllıon teńge qarjy bólindi, dep habarlaıdy QazAqparat tilshisi.

Eldegi tótenshe jaǵdaıǵa baılanysty Aqtóbe oblystyq máslıhattyń kezekten tys sessııasy ótti. Onda 2020-2022 jyldarǵa arnalǵan oblystyq bıýdjetke ózgertýler men tolyqtyrýlar engizildi. Oblystyq ekonomıka jáne bıýdjetti josparlaý basqarmasynyń basshysy Gúlkasıma Súıintaevanyń aıtýynsha, Jumyspen qamtýdyń jol kartasyn qarjylandyrý úshin respýblıkalyq bıýdjetten 33,4 mlrd teńge bólindi. Qarjy áleýmettik nysan, turǵyn úı qurylysy men jol jóndeýge qarastyrylǵan. Sonymen qatar az qamtylǵan otbasyn qoldaýǵa 727,7 mln teńge bólindi. Bul 36 myńnan astam otbasyǵa 20 myń teńgeden qosymsha kómek berýge baǵyttalǵan jumys.

«Azyq-túlik jáne kúndelikti qajetti taýardy úzdiksiz qamtamasyz etý úshin aımalymǵa 500 mln teńge bólindi. Áleýmettik jaǵynan osal sanattaǵy balalardy qashyqtan oqytýdy uıymdastyrý úshin 480 mln teńge bólip, 3 myń noýtbýk satyp alý qajet. Sonymen qatar koronavırýs ınfektsııasymen kúresý úshin medıtsınalyq jabdyqtardy satyp alýǵa 529 mln teńge bólý josparlanyp otyr», - dedi Gúlkasıma Súıintaeva.

Aıta keteıik, oblys boıynsha 402 mektep bar. Óńirde 151 myńǵa jýyq oqýshy bolsa, onyń 130 myńy óz kúshimen planshet, kompıýter qoldana alady. Oblystyq bilim basqarmasy baspasóz qyzmetiniń habarlaýynsha, sabaq ótetin mektep tizimi qazir naqtylanyp jatyr.