Aqtóbede qarjy pıramıdasyn qurǵan 2 adam sottaldy
AQTÓBE. QazAqparat - Aqtóbede eki adam qarjy pıramıdasyn quryp, 11 adamdy aldaǵany úshin sottaldy. Onyń biri Tájikstan azamaty, dep habarlaıdy QazAqparat tilshisi.
Aqtóbe qalasynyń № 2 sotynda S.D. Boboerov jáne P.R.Sýndýtovqa qatysty qylmystyq is qaraldy. Olarǵa Qylmystyq kodekstiń «Qarjylyq pıramıdasyn qurý jáne oǵan basshylyq etý» baby boıynsha aıyp taǵyldy. Іs materıalyna súıensek, 2019 jyldyń shilde aıynda Tájikstan azamaty Boboerov Qazaqstan azamaty Súndýtovpen birge qarjylyq pıramıda qurdy. Olar azamattardy «Unique finance» saıty arqyly «Unique finance» kompanııasyna salynǵan qarajattan aı saıyn 5-6% syıaqy alýǵa bolatynyn aıtyp, sendirdi. Salymshylardan aqsha alǵannan keıin shot quryldy. Onda materıaldyq qundylyǵy joq «sarapshylar» dep atalatyn elektrondy aqsha júkteldi. Osy jolmen Boboerov pen Sýndýtov 2019 jyldyń shildesinen bastap 2020 jyldyń qyrkúıegine deıin 11 jábirlenýshini tartyp, olardyń 7 094 110 teńge aqshasyn ıemdendi. Sottalýshylardyń kinási jábirlenýshilerdiń, kýágerlerdiń aıǵaqtarymen, tergeýdiń hattamalarymen, mamandardyń qorytyndylarymen dáleldendi.
«Prokýror sotta árqaısysyn 4 jyl merzimge bas bostandyǵynan aıyrý jazasyn taǵaıyndaýdy surady. Qylmystyq kodekstiń 217-baby 2-bóliginde kórsetilgen sanktsııada 3 jyldan 7 jylǵa deıin bas bostandyǵyn shekteý ne sol merzimge bas bostandyǵynan aıyrý túrindegi jazany kózdelgen. Bul aýyr qylmys. Zalal ótelmedi. Osyǵan baılanysty sot bas bostandyǵynan aıyrý túrindegi jazany ádil dep sanady. Zańda aıqyndalǵan talaptardy negizge ala otyryp, sot S.D. Boboerovty 3 jyl 6 aı, P.R.Sýndýtovty 3 jylǵa bas bostandyǵynan aıyrý jazasyn taǵaıyndady. Sottalýshy Sýndýtovtyń kámelet jasqa tolmaǵan balalarynyń bar ekeni eskerildi. Qylmystyq jolmen tapqan qarjyǵa satyp alynǵan múlik memleket paıdasyna tárkilendi. Úkim zańdy kúshine engen joq»,- dep habarlady Aqtóbe qalasy № 2 sotynyń baspasóz qyzmeti.
