Aqtóbede qarýly kúshter qataryna qabyldanǵan áskerı dárigerler ant berdi

AQTÓBE. QazAqparat – Eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda kýrsanttardyń saltanatty ant qabyldaý rásimi ótti, dep habarlaıdy QazAqparat tilshisi.

Ant qabyldaý sharasyna áskerı ınstıtýttyń jeke quramy, Aqtóbe garnızonynyń áskerı qyzmetshileri, Qarýly kúshterdiń ardagerleri, Aqtóbe qalasynyń «Jas ulan» áskerı-patrıottyq klýbynyń tárbıelenýshileri, sondaı-aq kýrsanttardyń týystary men jaqyndary qatysty.

«Ant berý degenimiz – Otanǵa, elińe adal bolý. Onyń mán-maǵynasy tereń. Áskerı boryshyn oryndaý arqyly ár áskerı qyzmetshi azamattyq jáne adamgershilik turǵyda jetilip, emtıhan tapsyrady. Endigi jerde sizderdiń barlyq áreketterińiz saltanatty túrde bergen anttyń talaptaryna saı kelýimen ólshenedi», - dedi Áýe qorǵanysy kúshteri áskerı ınstıtýtynyń bastyǵy Dáýren Qosanov.

Ant qabyldaǵanǵa deıin kýrsanttar negizgi áskerı daıyndyq kýrsynan ótti. Bir aı boıy olar jalpy áskerı jarǵylardy zerdelep, olardy kúndelikti ómirde basshylyqqa alýǵa daǵdylandy.

«Apam Sankt-Peterbýrgta oqıdy. Ol maǵan osy salany tańdaýǵa usynys jasady. Áskerı oqý ornvna keler buryn daıyndaldym. Shaqyrymdy baǵyndyryp, 100 metrge júgirdim. Túrli jattyǵý da nazarda boldy. Voleıbol oınaımyn. Munyń bári bizdiń áskerı ómirimizge daıyndyq boldy», - dedi Dıana Qaısarqyzy.

Áskerı oqý oryndaryna qabyldanǵan 146 kýrsanttyń 30-y oqýyn shetelde jalǵastyratynyn aıta ketken jón. Medıtsınalyq mamandyqtarǵa túsken qyzdar da alǵash ret erlermen bir sapta turdy. Bıyl 9 qyz S.M. Kırov atyndaǵy Reseı Federatsııasy Qarýly kúshteriniń jáne 4 qyz Mhıtar Geratsı atyndaǵy Erevan memlekettik medıtsına ýnıversıteti áskerı fakýltetiniń áskerı-medıtsınalyq akademııasyna oqýǵa tústi.