Aqtóbede qarý kezenip fotoǵa túsken jasóspirimder esepke alyndy
AQTÓBE. KAZINFORM – Aqtóbede qarý kezenip, fotoǵa túsken, keıin ony áleýmettik jelige júktegen bir top jasóspirim anyqtaldy. Polıtsııa olardy esepke aldy.
Aqtóbe oblystyq polıtsııa departamenti áleýmettik jelige monıtorıng jasap, 16-17 jastaǵy bozbalalardyń tapansha, pyshaq ustap turǵan fotolaryn anyqtady. Keıin jeli qoldanýshysyn anyqtap, tekserý júrgizdi.
— TikTok áleýmettik jelisinde 16-17 jas aralyǵyndaǵy jasóspirimder tapansha sııaqty zattardy ustap túsken birneshe fotosýretterin jarııalaǵan. Jedel-izdestirý is-sharalary nátıjesinde alty jasóspirimniń jeke tulǵasy anyqtalyp, olar polıtsııa bólimine jetkizildi. Tekserý barysynda olardyń beseýi Aqtóbe qalasyndaǵy joǵary jáne arnaýly orta oqý oryndarynyń stýdentteri, al bireýi aýdandaǵy mektepterdiń biriniń joǵary synyp oqýshysy ekeni anyqtaldy. Jasóspirimderdiń birinen gaz tapanshasy tárkilendi. Olar bul áreketke «kontent úshin» barǵanyn, qorqytý men zorlyq-zombylyqty nasıhattaý maqsaty bolmaǵanyn aıtty. Kámeletke tolmaǵandarmen jáne olardyń ata-analarymen profılaktıkalyq áńgimelesý júrgizildi, esepke alyndy. Jarııalanǵan posttar óshirilip, jasóspirimder oqıtyn bilim berý uıymdarynda qosymsha túsindirý jáne aldyn alý sharalary uıymdastyryldy, — dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.
Qazirgi kezde respýblıka aýmaǵynda «Jasóspirim» jedel-profılaktıkalyq is-sharasy ótip jatyr. Óńirde reıd, áleýmettik jelilerde monıtorıng júrgiziledi.
Eske salsaq, Aqtóbede er adamdy beıtanys bireý balalarynyń kózinshe pyshaqtaǵan. Polıtsııa qylmystyq is qozǵap, tergeý júrip jatyr.