Aqtóbede qarttar úıiniń turǵyndaryn bilikti dárigerler medıtsınalyq tekserýden ótkizdi
AQTÓBE. QazAqparat - Aqtóbedegi qarttar men múgedekter úıiniń turǵyndary nevropatolog, kardıolog, kóz dárigerleriniń qabyldaýynda boldy, dep habarlaıdy QazAqparat tilshisi.
Aqtóbedegi qarttar men múgedekter úıiniń turǵyndaryn Marat Ospanov atyndaǵy Batys Qazaqstan memlekettik medıtsınalyq ýnıversıtetiniń professorlary qabyldady. Kóz dárigeri men nevropatologqa, kardıolog dárigerlerine qaralǵan qarııalar óte kóp. Olardyń anyqtamalyq kitapshasy arnaıy alynyp, naýqastyń tarıhy qaralyp, dárigerler keńester berdi.
«Qarttar úıindegi emhanada dárigerler bar. Biz tekserý júrgizip, qajet kezde qala ishindegi dárigerlerdiń qabyldaýyna aparamyz. Portal arqyly aýrýhanaǵa jatady, em qabyldaıdy. Eger oqys jaǵdaı bolsa, jedel járdem shaqyramyz. Qarttar úıiniń turǵyndary úshin mundaı medıtsınalyq tekserý óte paıdaly. Bilikti dárigerler men medıtsına ǵylymdarynyń doktor, professorlaryna barý, qabyldaýyna kirý qıyn, keıde múmkin emes. Sondyqtan biz osy sátti tıimdi paıdalanyp, turǵyndardyń shaǵymymen naqty dıagnozyn bilip alamyz», - dedi qarttar úıiniń dárigeri Gúlmıra Mahambet. Onyń aıtýynsha, munda júrek-qan tamyrlary aýrýy, kóz, býyn aýrýlary jıi kezdesedi.
«Dárigerler kelip, em júrgizip jatyr. Bul óte sátti boldy. Meniń kózim aýyrady, baýynym syrqyraıdy. Keńes berildi. Ózim qarttar úıine 8 aı buryn keldim. Aqtóbe oblysy Áıteke bı aýdanynyń ortalyǵynda turdym. Zeınetke shyqtym, jalǵyz qaldym. Ómir boıy júrgizýshi bolyp, tynbaı eńbek ettim. Al qazir taǵdyrdyń jazýymen qarttar úıin panalap otyrmyn. Bári unaıdy, kútimimiz jaqsy», - dedi Saǵynǵalı Ábýov. Ol aldaǵy kúnderi jumys istep, aýla syparyp, kómek kórsetýdi jón kóredi. Ózi jas kezinde jeńil atletıkamen shuǵyldanǵan. Jattyǵý zalyna baryp turady. Velosıped minip, shańǵy tepkendi unatady.
«Nur Otan» partııasynyń Aqtóbe oblystyq fılıaly «Ardagerlerdi ardaqtaıyq» jobasy aıasynda dárigerlerdiń qabyldaýyn uıymdastyryp, keıin «Jas Otan» jastar qanaty kontsert qoıdy.
«Aqtóbede «Qarttarym, aman-saýmysyń» aktsııasy ótip jatyr. Biz zeınetkerlerge, soǵys ardagerlerine kómek kórsetip, aýla ishin tazalaýǵa, úı sharýashylyǵyna kómek kórsetemiz. Bul jastarǵa úlgi bolarlyq is. Biz árdaıym qarttarymyzǵa qurmet kórsetýimiz kerek. Olardyń árqaısysy el damýyna úles qosyp, óz zamanynda eńbek etti, bizdi búgingi kúnge jetkizdi. Jastar óz alǵysyn qamqorlyǵymen jetkizip jatyr», - dedi «Jas Otan» jastar qanatynyń Aqtóbe oblystyq fılıal tóraǵasy Asyljan Búrkitalın.
