Aqtóbede kartop baǵasy birden 100 teńgege qymbattap ketti

AQTÓBE. KAZINFORM - Aqtóbede kartop baǵasy 350-406 teńgege satylyp jatyr. Birer kún buryn ǵana 260-295 teńge bolǵan. 

Aqtóbe qalasynyń bazarlarynda, jetkizý qyzmetinde kartoptyń kelisi 350 teńgege satylyp jatyr. Al sýpermarkette kókónistiń bul túri kelisine 406 teńge turady. 

— Búgin ǵana kartop baǵasyn tasymaldaýshylar 300 teńge dep baǵalady. Bazarǵa kelisi 320 teńgege jetkizilgen. Reseı tasymaldaýǵa shekteý qoıyp, jergilikti taýar óndirýshiler baǵany ósirgen, - dedi azyq-túlik jetkizýshi kásipker.

Eske salsaq, Aqtóbe oblysynda áleýmettik mańyzy bar azyq-túlik baǵasynyń shekti mánin bekitý qaýlysy jarııa talqylaýǵa shyqty. Onda kartoptyń kelisi 285, qanttyń kelisi 510 teńge dep kórsetilgen.