Aqtóbede karbamıd óndiretin jańa zaýyt 2029 jyly iske qosylady
ASTANA. KAZINFORM — «QazMunaıGaz» ulttyq kompanııasy CNPC-men birlesip Aqtóbe oblysynda jylyna 800 myń tonna karbamıd óndiretin zaýyt salý jobasyn iske asyrýǵa kiristi. Jobany paıdalanýǵa berý 2029 jylǵa josparlanǵan. Bul týraly Úkimet otyrysynda kompanııa basqarma tóraǵasy Ashat Hasenov málim etti.
Budan bólek, joǵary oqý oryndarymen áriptestik aıasynda Manash Qozybaev atyndaǵy Soltústik Qazaqstan ýnıversıteti-men birlesip karbamıdti qaptaýǵa arnalǵan kúkirt-polımer óndirý boıynsha ǵylymı-zertteý jumystaryn bastaý kózdelip otyr.
— Kúkirt-polımer óndirý aýyl sharýashylyǵynda karbamıdti qoldaný tıimdiligin arttyrýǵa múmkindik beredi, — dedi Ashat Hasenov.
Sonymen qatar kompanııa ǵylymı-zertteý qyzmetin damytý sheńberinde kómirtegi izin azaıtýǵa baǵyttalǵan birqatar jobany júzege asyryp jatyr. Bul rette sýtegi energetıkasyn damytý baǵytynda keshendi jumystar qolǵa alynǵan.
— Birinshiden, jańartylatyn energııa kózderi negizinde «jasyl» sýtegi óndiretin eksperımenttik qondyrǵy ázirlendi. Elektrolızer qýaty 20 kVt bolǵan jaǵdaıda sýtegi óndirý kólemi saǵatyna 5 qalypty tekshe metrge jetti. Al elektr energııasyn óndirýdiń eń joǵary kórsetkishi saǵatyna 32 myń kVt boldy (2025 jyl), — dedi ol.
Sonymen qatar ol sýtegini saqtaý jáne tasymaldaýǵa arnalǵan arnaıy qorytpalar ázirlenip, júrgizilgen zertteýler nátıjesinde materıal quramyndaǵy sýtegi mólsheri qorytpa massasynyń 0,8%-yna jetti (halyqaralyq standart — 1,5-2%) dep málimdedi.
Spıker sýtegini elektr jáne jylý energııasyn óndirýde qoldanýdyń halyqaralyq tájirıbesi zerdelenip jatqanyn aıtyp, Qazaqstanda alǵash ret sýtegi energetıkasynyń áleýetin baǵalaýǵa arnalǵan tsıfrlyq platforma ázirlengenin atap ótti.
— Atalǵan júıe óńirlerdiń sý resýrstarymen qamtamasyz etilý deńgeıin, kún jáne jel energetıkasynyń múmkindikterin, sondaı-aq sýtegi óndirisiniń áleýeti men ózindik qunyn keshendi túrde baǵalaýǵa múmkindik beredi, — dep tolyqtyrdy kompanııa ókili.
Buǵan deıin QazMunaıGaz 80 tehnologııalyq jobany júzege asyryp jatqanyn jazǵanbyz.
Sonymen qatar elde 4,7 mlrd tonnaǵa jýyq shartty otyny bar jerlerge geologııalyq barlaý jobasy jasalǵanyn habarlaǵanbyz.
