Aqtóbede Qaratal aýylyna gaz berildi
Qaratal aýylynda 1400-deı adam kógildir otynǵa qol jetkizdi. Bul maqsatqa memleket 457 mln teńgeden astam qarjy bóldi.
«Endi jumystaryńyz jeńildep, yńǵaıly bolatynyna qýanyshtymyn. Burynǵydaı kómir men aǵash satyp alyp, ot jaqpaısyzdar, kúl shyǵarmaısyzdar. Óskeleń urpaqty tárbıeleýge kóp ýaqyt bóletin bolasyzdar. Elimizdiń 30 jyldyq táýelsizdigimen jáne Jańa jyldaryńyzben quttyqtaımyn»- dedi oblys ákimi Ońdasyn Orazalın.
Sondaı-aq Oıyl aýdanynda Bestamaq aýylynyń 220-dan astam turǵynyn ortalyqtandyrylǵan sýmen qamtıtyn sýmen jabdyqtaý júıesi paıdalanýǵa berildi. Jobany júzege asyrýǵa 241 mln teńgedeı bıýdjet qarjysy bólingen. Aýdan ákimi Asqar Qazybaev atqarylǵan jumystar men 2022 jylǵa qoıǵan josparlar jaıynda esep berdi.
«Bizdiń aýdanda barlyǵy 22 eldi meken bar, onyń jıyrmasy ortalyqtandyrylǵan sýmen qamtylǵan. Sonyń ishinde bıyl 200 adamnan aspaıtyn halqy bar bes aýylǵa qosymsha qarajat esebinen sý tazartatyn blokti-modýldi stansa ornatyldy. Qalǵan Qarasý men Shubarshıdi sýmen jabdyqtaý boıynsha jobalyq-smetalyq qujattama ázirlendi.
Sonymen qatar, osy jyly aýdan boıynsha 14 kóshege asfalt tóselse, olardyń beseýi aýdan ortalyǵynda. Qaratal men Qumjarǵan aýyldarynyń kósheleri 100% jaryqtandy.
Budan ózge, Qaratal aýylynyń kóshelerine 5 beıne baqylaý kamerasy ornatylyp, ýchaskelik polıtsııa beketine qosyldy.Nátıjesinde, bıyl aýylda bir de bir quqyqbuzýshylyq tirkelgen joq. Sonyń ishinde mal urlyǵy deregi tirkelmedi»,- deıdi aýdan ákimi Asqar Qazybaev.