Aqtóbede qarasan aýrýynan mal ólip, sharýashylyq aýmaǵyna shekteý qoıyldy
Aqtóbe oblysy Oıyl aýdany “Samǵat” sharýa qojalyǵynda 6 bas iri qara qarasan aýrýynan óldi. Soǵan saı sharýa qojalyǵy aýmaǵyna shekteý qoıyldy. Bir aı ishinde mal kirgizýge, aýmaqtan shyǵarýǵa tyıym salynǵan, dep habarlaıdy Kazinform.
"17 qarasha kúni Kóptoǵaı aýyldyq okrýgi ákiminiń sheshimi shyqty. Sheshim aıasynda shekteý jarııalandy. Shekteý jumystary kezinde sharýa qojalyǵynyń qorasyna zalalsyzdandyrý júrgiziledi. Іri qaranyń bárine qarasan aýrýyna qarsy vaktsına egiledi. Talap boıynsha 30 kún ishinde syrttan basqa mal kirgizilmeıdi jáne syrtqa shyǵarylmaıdy. Bul jaıylymǵa aýyl maly aralaspaıdy. Sondyqtan shekteýdiń jaqyn mańdaǵy Amangeldi aýylyna esh qatysy joq", - dedi Aqtóbe oblystyq veterınarııa basqarmasynyń bas mamany Arslanbek Aldııar.
Aıta keteıik, 8 qarasha kúni iri qara ólip, maldan synama alynǵan. 15 qarasha saraptama qorytyndysy shyqty. Qojalyqta 325 bas múıizdi iri qara, 576 bas usaq mal bar. 17 qarasha kúni epızotııaǵa qarsy otrıad Kóptoǵaı aýyldyq okrýginiń ákiminiń sheshimimen ekpe jumystaryn júrgizdi.
