Aqtóbede karantınge qaramastan meıramhanada as bergender jaýapqa tartyldy
AQTÓBE. QazAqparat – Aqtóbe polıtsııasy oblystyń bas sanıtar dárigeriniń qaýlysy aıasynda tekserý júrgizdi. Avtobýs ishine adamdardy belgilengen shekten kóp mingizgen jáne meıramhanada as bergender jazalandy, dep habarlaıdy QazAqparat tilshisi.
Karantın talaptary boıynsha qazir jolaýshy tasymaldaıtyn avtobýstyń teń jartysyna ǵana adam otyrǵyzýǵa ruqsat. Bul týraly oblystyń bas memlekettik sanıtar dárigeriniń qaýlysy bar. Al Qobda aýdany arqyly ketip bara jatqan avtobýstyń ishi adamǵa toly bolǵan. Polıtsııa qazir osy jaǵdaı boıynsha tekserý jumystaryn júrgizip jatyr.
«Aqtóbe oblystyq Polıtsııa departamenti patrýldik polıtsııa rotasynyń qyzmetkerleri Qobda aýdanynyń aýmaǵynda avtobýsty toqtatty. Salon ishinde bolǵan 42 Ózbekstan azamatynyń Atyraýdan Shymkent qalasyna bara jatqany anyqtaldy. QR ÁQbK «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baby boıynsha júrgizýshige 20 AEK kóleminde aıyppul salyndy. Sondaı-aq Qobda polıtsııa bóliminiń ýchaskelik polıtsııa ınspektory aýyldardyń birinde karantın shekteýine qaramastan, meıramhanada sadaqa, as berý ótkizgenin anyqtady. Meıramhanaǵa 60-qa jýyq adam jınalǵan. QR ÁQbK «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baby boıynsha meıramhana ıesi ákimshilik jaýapqa tartyldy. Materıal zerdeleý maqsatynda sanıtarlyq-epıdemıologııalyq qyzmetke jiberildi»,-delingen habarlamada.
