Aqtóbede karantındi óreskel buzǵan bıznes sýbektilerin sý men jaryqtan ajyratý usynyldy

AQTÓBE. QazAqparat – Aqtóbeniń bas sanıtar dárigeri Nursulý Berkimbaeva karantın shekteý sharasyna qaramastan meıramhana men dámhanada toı men eske alý sharasy ótkizilgenin, endi bıznes sýbektileri sý men jaryqtan ajyratylýy múmkin ekenin aıtty, dep habarlaıdy QazAqparat tilshisi.

Aqtóbe oblysy «sary» aımaqta bolsa da, turǵyndar toı men eske alý sharasyn ótkizip jatyr.

Búgin Aqtóbe oblysy sanıtarııalyq-epıdemıologııalyq baqylaý departamentiniń basshysy Nursulý Berkimbaeva shekteýge qulaq aspaǵandar úshin talap qaıta kúsheıetinin habarlady.

«Oblysta 47 mobıldi top bar. Olar 160-tan astam tekserý júrgizip, materıaldardy departamentke tapsyrdy. Qazirgi kezde 142-ine qatysty ákimshilik hatttama toltyryldy. Olarǵa 19 mıllıon teńge aıyppul salyndy. Biraq dámhana men meıramhanada toı men basqa da otbasylyq, ujymdyq basqosý ótkizýge bolmaıy degen eskertýge selsoq qaraıtyndar bar. Sondyqtan ákimdikke bıznes sýbektilerin kommýnaldyq jeliden ajyratýǵa usynys berip otyrmyz», - dedi Nursulý Berkimbaeva.

Aıta keteıik, ótken táýlikte óńirde 61 adamnan koronavırýs ınfektsııasy anyqtaldy. Onyń 51-i derttiń sımptomdy túrine shaldyqqan.

«Qazirgi kezde 300-den astam adam ınfektsııalyq aýrýhanada em qabyldap jatyr. Onyń 18-i jansaqtaý bóliminde. Qazir ekeýi ókpeni jasandy jeldetý apparatyna qosylǵan», - dedi oblystyq densaýlyq saqtaý basqarmasynyń basshysy Rústem Isaev.

Qazirgi kezde taǵy 1 myńnan astam adam karantınde jatyr. Olar eki apta dárigerler baqylaýynda bolady.