Aqtóbede karantın týraly jalǵan aqparat taratqan áıel úsh táýlikke qamaldy
AQTÓBE. QazAqparat – Aqtóbelik turǵyn karantınde bolǵany týraly áleýmettik jeli arqyly jalǵan málimet taratyp, 3 táýlikke qamaldy, dep habarlaıdy QazAqparat tilshisi.
Áleýmettik jelilerge monıtorıng júrgizý kezinde «karantınge qaramastan kovorkıngke baryp, kofe iship, qala ishinde serýendedim» dep jazba jarııalaǵan Aqtóbe qalasynyń turǵyny anyqtaldy. Tekserý kezinde karantınde jatqan azamattar tiziminde ol adamnyń joq ekeni anyqtaldy.
«QR ÁQBtK-niń 478-baby, ıaǵnı, «Tótenshe jaǵdaı kezinde quqyq tártibin buzýǵa ıtermeleıtin is-áreketter» boıynsha ákimshilik hattama toltyryldy. 27 naýryzda mamandandyrylǵan ákimshilik sot sheshimimen ol 3 táýlikke qamaldy. Kún saıyn polıtsııa qyzmetkerleri eriktilermen birge kóshelerde tótenshe jaǵdaı rejımin saqtaýdy tekseredi. Qazirgi ýaqytta tártip saqshylary QR ÁQBtK-niń 476-baby boıynsha tótenshe jaǵdaı rejımin buzbaq bolǵan 33 derektiń aldyn aldy. Jalǵan jáne rastalmaǵan aqparatty taratatyn jáne quqyq tártibin buzýǵa ıtermeleıtin azamattar ÁQBtK-niń 478-baby boıynsha jaýapqa tartylady. Osy bap boıynsha bir adam ákimshilik jaýapkershilikke tartylyp, 106 myń teńgege aıyppul tóledi», - dedi oblystyq PD baspasóz qyzmetiniń jetekshisi Erbolat Sarqulov.
