Aqtóbede karantın talaptaryn buzǵandarǵa 53 mln teńge aıyppul salyndy
AQTÓBE. QazAqparat – Aqtóbede kásipkerlik sýbektileri shekteý sharasynda bekitilgen jumys ýaqytyn eskerer emes. Olarǵa 53 mıllıon teńgeden astam aıyppul salyndy, dep habarlaıdy QazAqparat tilshisi.
Aqtóbede mobıldi toptary, jergilikti polıtsııa qyzmetkerleri Bas memlekettik sanıtarııalyq dáriger qabyldaǵan qaýlynyń oryndalýyn baqylady. Ákimshilik quqyq buzýshylyq týraly Kodekske sáıkes 476 hattama toltyrylyp, 53 mln teńge kóleminde aıyppul salyndy.
«Tirkelgen faktiniń 23,5% kásipkerler jumys ýaqytyn eskermedi, shekteý talabyn saqtamady. Betperde taqpaıtyndar men áleýmettik araqashyqtyqty saqtamaıtyndar da bar. Dene qyzýyn ólshemeı qyzmetkerlerdi jumysqa jiberedi, jumys isteýge ruqsaty joq nysan ıeleri qyzmet kórsetedi.
Al turǵyndar toı, qyz uzatý saltanatyn áli de ótkizip jatyr. Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti oblys turǵyndaryn koronavırýs ınfektsııasynyń aldyn alý úshin merekelik sharalardy, toı, otbasylyq jıyndy toqtata turýǵa keńes beredi», - dedi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Aısáýle Oralbaeva.
Aıta keteıik, sońǵy táýlikte úsh adamnan koronavırýs ınfektsııasy anyqtaldy. Onyń bireýi sımptomsyz. Vırýs juqtyrǵandardyń biri 82 jastaǵy qarııa, ekinshisi 56 jastaǵy er adam. Oblysta jalpy 3221 adamnan vırýs anyqtaldy. Onyń 93,4% jazyldy.
