Aqtóbede karantın talabyn saqtamaǵandarǵa 177 mln teńge aıyppul salyndy
Aqtóbede epıdemıologııalyq jaǵdaı turaqty. Ótken táýlikte 4 adamnan COVID-19 anyqtaldy.
Oblys ákiminiń birinshi orynbasary Nurjaýǵan Qalaýovtyń aıtýynsha, óńirdegi «Jaısań» jáne «Álimbet» sanıtarlyq kólik beketteri, áýe qatynasy arqyly 65 myńnan astam adam kelip, onyń 6 myńǵa jýyǵynda PTR test nátıjesi bolmaǵan.
Bári karantın statsıonaryna jatqyzylyp, 47 adamnan koronavırýs anyqtaldy.
Aıta keteıik, qajet bolǵan jaǵdaıda kereýet sany 445-ten 3603-ke deıin artady. Onyń 80 paıyzdan astamy ottegimen qamtylǵan.
Medıtsınalyq mekemelerge 21 statsıonarlyq rentgen apparaty ornatylyp, ókpeni jasandy jeldetetin 367 apparat qondyryldy.
Sonymen birge 582 ottegi kontsentraty, 626 ottegi ballony, 787 Bobrov apparaty men 461 ottegi jastyǵy bar.
Jedel járdem beketi men emdeý mekemeleriniń avtoparki 41 sanıtarlyq mashınamen tolyqty, 6 mobıldi dıagnostıkalyq keshen satyp alyndy.
Búginde 47 baqylaý toby 9 myńnan astam reıd júrgizip, 177,6 mln teńgege aıyppul salyndy.
«Bizdiń oblys «jasyl» aımaqta tur. Biraq kórshi oblystar men Reseı Federatsııasyndaǵy jaǵdaı bizge qaýipti. Ári óńir arqyly «Batys Eýropa – Batys Qytaı» halyqaralyq kólik dálizi ótip jatyr. COVID-19 qaýpi áli seıilgen joq, sondyqtan arqany keńge salýǵa bolmaıdy. Koronavırýs ınfektsııasyna qarsy ekpege qatysty aqparattyq-túsindirý jumystaryn kúsheıtý qajet. Birinshi kezeńde bizdiń oblysta medıtsınalyq qyzmetkerlerdi, muǵalimderdi, kúshtik qurylym qyzmetkerlerin qosqanda turǵyndardyń aýrýǵa tez shaldyǵatyn tobyn, ıaǵnı, jalpy alǵanda 150 myń adamdy qamtý josparlanyp otyr. Baqylaý toptary óz jumysyn jalǵastyrýy kerek»,- dep tapsyrdy oblys ákimi Ońdasyn Orazalın.