Aqtóbede karantın talabyn saqtamaǵan kásiporyndar jumysyn toqtatty
AQTÓBE. QazAqparat - Arnaıy monıtorıng toby óz erkimen jumysyn bastaǵan bıznes sýbektilerin anyqtap, qyzmetin toqtatty, dep habarlaıdy QazAqparat tilshisi.
Aqtóbe oblysy boıynsha monıtorıng tobynyń quramynda jergilikti atqarýshy organdardyń, qoǵamdyq keńesterdiń, «Atameken» UKP ókilderi, jergilikti polıtsııa qyzmeti bar. Olar oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń jáne onyń aýmaqtyq basqarmalarynyń mamandarymen birge kún saıyn tekserý ótkizedi.
«Mobıldik top 916 nysandaǵy jumysty tekserdi. Olardyń qatarynda shaǵyn saýda oryndary, dárihana, atele, avtoservıs, monsha, saýna, sulýlyq salony, qonaqúı bar. Tekserý kezinde 79 obektide kemshilik anyqtaldy. Olarda dezınfektsııalyq kilemshe, dene qyzýyn ólsheý quraly bolmady. Araqashyqtyq saqtalmaǵan. Sondaı-aq qyzmetkerler, kelýshiler maskalyq rejımdi oryndamady. Qaıta qadaǵalaý kezinde kásipkerlik sýbektilerde tirkelgen kemshiliktiń joıylǵany belgili boldy. Al qyzmetin negizsiz jáne óz erkimen qaıta jandandyrǵan 7 kásipkerlik nysan óz qyzmetin toqtatty. Onyń ishinde fıtnes klýby, Ortalyq bazary, avtobólshekter satatyn eki bazar, saýda úıleri bar. Monıtorıngtik toptardyń jumysy jalǵasýda», - dedi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
Mamandar koronavırýs ınfektsııasynyń aldyn alý maqsatynda barlyq talaptardy saqtaýǵa shaqyrady. Oblys turǵyndary arasynda koronavırýs ınfektsııasy boıynsha aýrýshańdyq tómendep, turaqtanǵan jaǵdaıda adam kóp jınalatyn obektiler, onyń ishinde bazarlar, mektepke deıingi mekemeler qyzmeti qalpyna keltiriledi.
