Aqtóbede karantın talabyn buzǵandarǵa 34 mln teńge aıyppul salyndy

AQTÓBE. QazAqparat – Aqtóbede mobıldi toptarmen qatar turǵyndar da shuǵyl habar berip, karantın talabyn buzǵandar jazalanyp jatyr, dep habarlaıdy QazAqparat tilshisi.

Aqtóbe oblysy boıynsha 40-tan astam monıtorıng top bar. Olar qoǵamdyq tamaqtaný orny, qoǵamdyq kólik pen saýda ortalyqtarynda karantın shekteýin saqtaý talabyn baqylaıdy.

«Mobıldi toptardan jáne jergilikti polıtsııa qyzmetinen túsken materıaldarǵa sáıkes bıyl 225 is sotqa jiberildi. Ákimshilik quqyq buzýshylyq týraly Kodeksiniń 425-baby 1-bóligi boıynsha 31 mln teńgeden astam aıyppul salyndy. Sonymen birge, Úılestirý ortalyqtaryna túsken shuǵyl habarlama negizinde jospardan tys 28 tekserý júrgizildi. Tekseris qorytyndysy boıynsha 28 obektige 3,5 mln teńge aıyppul salyndy», - dedi Aqtóbe oblysy sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.

Aıta keteıik, óńirde koronavırýs ınfektsııasyn juqtyrǵan balalar sany artty. Qazir 10 bala ınfektsııalyq statsıonarda jatyr.