Aqtóbede karantın talabyn buzǵandar 182 mln teńge aıyppul tóledi
AQTÓBE. QazAqparat – Aqtóbede mobıldi toptarmen qatar úılestirý keńesi jumys istep tur. Karantın talabyn buzǵandar týraly 30-ǵa jýyq shuǵyl habarlama túsip, olarǵa 5 mıllıon teńge aıyppul salyndy, dep habarlaıdy QazAqparat tilshisi.
Ótken táýlikte óńirde 12 adamnan koronavırýs ınfektsııasy anyqtaldy. Aqtóbe qalasy men Mártók, Alǵa aýdandarynyń turǵyndary dertke shaldyǵyp, olar dárigerler baqylaýyna alyndy. Aýrýshańdyqtyń ósý deńgeıi - 0,3 paıyzdy quraıdy. Jalpy oblysta 3926 jaǵdaı tirkeldi. Onyń 95 paıyzy jazylyp shyqty. Qazir 372 adam úı karantıninde.
«Oblys boıynsha ınfektsııalyq aýrýhanalarda 90 adam em alyp jatyr. Sonyń ishinde qalada 67 adam bar. Onyń 13-i jansaqtaý bóliminde bolsa, bireýi jasandy tynys alý apparatyna qosylǵan. Jedel járdem shaqyryp, kómek suraǵandar sany azaıyp keledi. Táýligine 700-den astam qońyraý túsedi», - dedi oblystyq densaýlyq saqtaý basqarmasynyń basshysy Rúlstem Isaev.
Aıta keteıik, óńirde mobıldi toptarmen qatar úılestirý keńesi jumys istep tur.
«Úılestirý ortalyǵyna 30-ǵa jýyq shuǵyl habarlama tústi. Tekserý ótkizilip, ákimshilik jaýapkershilikke tartylyp, 5 mıllıon teńge aıyppul salyndy. Qazir taǵy 19 materıal sotta jatyr. Biz obektini jabý týraly usynys berdik. Jalpy monıtorıng top 1 myńnan astam quqyqbuzýshylyqty anyqtady, 182 mıllıon teńgege aıyppul salyndy», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
