Aqtóbede karantın shekteýi jeńildeıdi

AQTÓBE. QazAqparat – Aqtóbe bir aptaǵa jýyq ýaqyttan beri «jasyl» aımaqta. Óńirde karantın shekteýi jeńildeıdi, dep habarlaıdy QazAqparat tilshisi.

Aqtóbede ótken táýlikte 32 jaǵdaı tirkeldi. Derttiń sımtomdy túrine shaldyqqandar Aqtóbe qalasy men Alǵa, Muǵaljar aýdanynyń turǵyndary. Aýrýshańdyqtyń ósý deńgeıi 0,3% qurap otyr. Búginge deıin óńirde barlyǵy 11 235 jaǵdaı tirkelip, onyń 91 paıyzdan astamy jazyldy. Qazirgi kezde áli de 3280 adam úı karantıninde. Bári dárigerler baqylaýyna alynǵan.

«Jasyl» aımaqta turǵanymyzǵa besinshi kún. Erteń Aqtóbe oblysy bas sanıtar dárigeriniń karantın shekteýin jeńildetý qaýlysy shyǵarylady. Degenmen maska taǵý, áleýmettik araqashyqtyqty saqtaý talaby sol kúıi qalady»,- dedi oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.

Qazir oblys boıynsha 398 adam em alyp jatyr. Onyń 267-i qalada. Qazir naýqastardyń 28-i jansaqtaý bóliminde jatyr.

«Karantındik statsıonarlarda 18 adam baqylaýda. Qazir ınfektsııalyq kereýetter júktemese 26,7, reanımatsııalyq 17,4 paıyzdy qurap otyr. Óńirde vaktsınatsııa jumysy da jalǵasyp jatyr. Qazir 39 myńnan astam adam vaktsınanyń eki komponentin de qabyldady», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.