Aqtóbede karantın shekteýi jeńildedi
AQTÓBE. QazAqparat - Aqtóbe bir aptadan beri «jasyl» aımaqta tur. Búgin oblystyń bas sanıtar dárigeri jańa Qaýly shyǵardy, dep habarlaıdy QazAqparat tilshisi.
Aqtóbe oblysynda adamdar kóp jınalatyn konferentsııa, forým, sherý, jıyn, oıyn-saýyq, merekelik, sondaı-aq otbasylyq, saltanatty, estelik jáne basqa da is-sharalardy ótkizýge bolmaıdy. Degenmen «ASHYQ» jobasy kóp kásipkerdiń jumysyn jeńildetti.
«Bılıard, kompıýterlik, boýlıng klýbtary jumysyn bastaı alady. Tek ondaǵy adam sany syıymdylyqtyń 30% aspaýy tıis. Sonymen birge balalardyń oıyn-saýyq ortalyqtarynda adam sany 50-den aspaıdy. Banket zaldarynda da adam sany 50-den kóp bolmaýy tıis. Dinı obektiler, onyń ishinde meshit, pravoslavıe shirkeýi jáne basqa da dinı obektiler aýmaǵynda ujymdyq dinı is-sharalar ashyq aýada ótkizilýi tıis. Betperde rejımi men bir adamǵa keminde 4 metr esebinen áleýmettik qashyqtyq saqtalǵany durys»,- dedi oblystyq sanıtarııalyq-epıdemıologııalyq baqylaý departamentiniń baspasóz qyzmeti.
Mádenıet, sport obektilerinde oqý-jattyǵý, daıyndyq júrgizýge ruqsat bar. Kórermen jınaýǵa da múmkindik berildi.
«Balalardyń túzetý kabınetteri, balalar men eresekterdiń bilim berý ortalyqtary, jabyq bazarlar, bankter, HQKO, «Qazposhta» AQ bólimsheleri, saýna, SPA-ortalyq, basseınderge esh shekteý joq. Balalardy saýyqtyrý uıymdary (mektep janyndaǵy, qala syrtyndaǵy lagerler), ashanalar táýlik boıy jumys isteıdi. Al meıramhana, dámhana jáne kofehana sekildi qoǵamdyq tamaqtaný obektileri saǵat 07:00-den 02:00-ge deıin qyzmet kórsetedi»,- dep atap ótilgen Qaýlyda.
