Aqtóbede karantın kúsheıtilgenimen adamdardyń beıbereket júrýi azaıar emes

AQTÓBE. QazAqparat – Aqtóbe oblysynda karantın rejımi kúsheıtildi. Degenmen adamdardyń beıbereket júrýi azaıar emes, dep habarlaıdy QazAqparat tilshisi.

Úıde otyryp, ereje saqtaıtyn aqtóbelikter keıbir adamdardyń beıqam júrgenin aıtyp, polıtsııadan baqylaýdy kúsheıtýdi surady. Jergilikti arnada ótken tikeleı efır kezinde oblystyq taýarlar men kórsetiletin qyzmetter sapasy men qaýipsizdikti baqylaý departamentiniń basshysy Nursulý Berkimbaeva eskertýge qulaq aspaı, kóshede júretinderdiń bar ekenin jasyrmady.

«Qaýipsizdik úshin shekteý sharasy, karantın rejımi engizildi. Men qaladaǵy iri sýpermarketterge bardym. Jaǵdaıdy baqylap, bárin óz kózimmen kórdim. Shynyn aıtqanda, qalada karantın rejımi engizilgeni múlde sezilmeıdi. Adamdar taýar satyp alýǵa úzdiksiz kelip jatyr. Asyqpaı aralap, tańdap, talǵap júr. Úreı joq, qorqynysh sezilmeıdi. Araqashyqtyqty saqtamaǵan, bir-birine jaqyn júr. Eskertý berilse de eshkim qulaq aspaıdy. Keıbiri eskertý úshin ashýlandy. Bul durys emes. Al bazarlar jabyq tur. Ashyq bolsa adamdar «qydyryp» júrgendeı aralaı beredi eken. Búgin naqty jaǵdaıdy kórgen soń sýpermarketke 10-15 adamnan ǵana kirgizýge tapsyrma berildi. Áli de adamdar túsinbeıdi, talap osylaı ózgeredi», - dedi oblystyq taýarlar men kórsetiletin qyzmetter sapasy men qaýipsizdikti baqylaý departamentiniń basshysy Nursulý Berkimbaeva.

Aıta keteıik, Aqtóbede eki sýpermarket, bir emhana, bir stomatologııa, tórt úıdiń podezi karantınge jabylǵan bolatyn.