Aqtóbede karantın kezinde kómektesken volonterler marapattaldy
Shara barysynda Ońdasyn Orazalın «Jas Otan» jastar qanaty 500-den astam eriktini ıgi isterge jumyldyryp, jalǵyzbasty qarııalarǵa, erekshe qajettilikteri bar azamattarǵa jáne turmysy tómen kópbalaly otbasylarǵa azyq-túlik sebetin, maskalar men eń qajetti zattardy jetkizip bergenin atap ótti.
Odan basqa jasotandyqtar Maqtaral aýdany turǵyndaryna 125 tonna qajetti zattardy jóneltýge qol ushyn sozǵan. Ońdasyn Orazalın Tuńǵysh Prezıdent – Elbasy, Partııa Tóraǵasy N.Nazarbaevtyń bastamasymen «Birgemiz» respýblıkalyq qoǵamdyq qorynan muqtaj jandarǵa qoldaý kórsetilgenin aıtty.
Búginge deıin oblys qalalarynyń 24 myńnan astam turǵyny 50 000 teńgeden jalpy somasy 1,2 mlrd teńge kómek alǵan. Aldaǵy ýaqytta bul kómekpen Alǵa, Áıteke bı, Baıǵanın, Yrǵyz, Qobda, Qarǵaly, Mártók, Temir jáne Oıyl aýdandaryna qarasty 20 aýyldyń 4,5 myńǵa jýyq turǵynyn qamtý qarastyryldy.
«Qoǵamdyq qordyń kómegi az qamtylǵan otabysylarǵa, múgedekterge, jalpy kómekke muqtaj adamdarǵa úlken demeý boldy. Ol Elbasynyń partııanyń Lıderi retinde bergen tapsyrmasyna sáıkes istelgen jumys. Eriktilerimizdiń demalys kúnderine qaramaı, eleýli eńbek etkenderiniń arqasynda quny 152 mln. teńgeniń azyq-túligi muqtaj jandarǵa taratyldy. Onyń bárin úlestirgen, jetkizgen ózderińizsizder», - dedi partııanyń Aqtóbe oblystyq fılıaly tóraǵasy.
Osy aptanyń ishinde Nursultan Nazarbaevtyń alǵys hattarymen respýblıka boıynsha úsh myńdaı qazaqstandyq marapattalady. Olardyń arasynda Aqtóbeden 300 erikti men belsendi bar.
«Maǵan qazaq halqynyń osyndaı qıyn kezde uıymshyldyǵy unaıdy. Búgingi tirligimiz asar dástúriniń jarqyn kórinisi. Biz úsh boıy turaqty túrde qıyndyqqa tap bolǵan otbasylarǵa azyq túlik, medıtsınalyq maskalar tarattyq. Bul ıgi isti áli de jalǵastyramyz. Eńbektenýdi erte bastaǵan aýdan jastary qıyndyqtan qoryqpaıdy, taısalmaıdy. Biz árdaıym Elbasynyń bastamasymen elimizdiń gúldený jolynda eńbektenýge daıarmyz», - dep Mártók aýdanynan kelgen volonter Artem Raızıh óz oıymen bólisti.
