Aqtóbede karantın kezinde dúrkiretip toı jasaǵandar anyqtaldy
Aqtóbede bir táýlikte óńirde taǵy 416 adamnan koronavırýs ınfektsııasy anyqtaldy. Bul kezekti antırekord. Qazir oblystyq ınfektsııalyq aýrýhana men statsıonarlarda myńnan astam adam em qabyldap jatyr. Onyń 700-den astamy qalada. Oblystyq densaýlyq saqtaý basqarmasy basshysynyń orynbasary Bekbolat Іzbasarovtyń aıtýynsha, jansaqtaý bólimindegi naýqas sany 100-den asyp ketken. Onyń 13-i ókpeni jasandy jeldetý apparatyna qosyldy.
«Búgin monıtorıng toptarynyń reıdi barysynda 7 karantın rejımin buzý faktisi anyqtaldy. «Zolotoı kolos», «Asyl», «El mura», «Juldyz», «Turan» jáne «Han orda» meıramhanalarynda 80-100 adam jınalyp, toı jáne sadaqa ótkizgeni anyqtaldy. Jergilikti polıtsııa qyzmetkerlerimen saltanatty is-sharalar toqtatylyp, taratyldy. Karantın rejımin buzýdyń barlyq deregi boıynsha materıaldar ýákiletti organǵa jiberildi», - dep habarlady qala ákimdigi janyndaǵy monıtorıng toby.
Aqtóbe oblysy sanıtarııalyq-epıdemıologııalyq baqylaý departamentiniń habarlaýynsha, monıtorıng toptarynan jáne jergilikti polıtsııa qyzmetinen túsken materıaldarǵa sáıkes jyl basynan beri 66 mıllıon teńge kóleminde 593aıyppul salyndy. Búgingi kúni Úılestirý ortalyqtarynan túsken shuǵyl habarlama negizinde jospardan tys 51tekserý júrgizildi. Tekseris qorytyndysy boıynsha 8 mln teńge kóleminde aıyppul salyndy.