Aqtóbede qar jaýyp, kólik dóńgelegin aýystyrýǵa kezek kóbeıdi
AQTÓBE. KAZINFORM - Aqtóbede qar jaýyp tur. 2025 jylǵa joldardy kútip ustaýǵa 2,7 mlrd teńge bólinedi. Al kólik jóndeıtin tehnıkalyq qyzmet kórsetý oryndarynda kezek kóp.
Aqtóbe qalasynda qazir qar jaýyp tur. Munda qozǵalysta qandaı da bir kedergi baıqalmady. Degenmen kólikke qyzmet kórsetetin oryndarda kezek tańǵy saǵat 7:00-de bastaldy. 9:00-de ǵana jumysyn bastaǵan jumysshylar ár 20-30 mınýt saıyn bir kóliktiń 4 dońǵalaǵyn aýystyrady.
- Qar jaýǵan kúni dál osyndaı kezekti kóremiz. Bul biz úshin úırenshikti jaǵdaı ári tabysymyz artady. Tańda ashylǵannan beri 5 kólikke qyzmet kórsettik. Olar ózara kezekke turady, biz sol kezekpen aýystyryp beremiz. Shınomontajda 4 adam jumys istep jatyr. Árkimniń óz qyzmeti bar. Biri dońǵalaqty sheship alady, ekinshisi jaramdylyǵyn tekserip, almastyrady. Kóktaıǵaq joq qazir, biraq adamdar saqtyq úshin aýystyrady. Qar jaýmaǵanda, qazan aıynyń sońynda-aq kezek qoıyp jatty», - dedi tehnıkalyq qyzmet kórsetý ornynyń qyzmetkeri Anton Stepanov. Bul jerdegi qyzmet quny 6 myń teńgeden bastalyp, 10 myń teńgege jetedi.
Aqtóbe oblysy ákiminiń baspasóz qyzmetiniń habarlaýynsha, jergilikti joldardy kútip ustaý úshin 2025 jylǵa 2,7 mlrd. teńge qarastyrylǵan. Bul soma oblystyq máslıhattyń taıaýdaǵy sessııasynda bekitiledi.
- Oblystaǵy joldardyń jalpy uzyndyǵy – 4 440 shaqyrym. Onyń ishinde 1 265 shaqyrymy oblystyq mańyzy bar, 3 175 shaqyrymy aýdandyq mańyzy bar jol. Bul joldardy qysta kútip ustaýǵa 43 merdiger uıym jaýapty. 401 tehnıka, 5 myń tonna ınertti materıal, 965 tonna dızel otyny ázirlendi. Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyrdyń aıtýynsha, jylytý pýnktterin daıyndaý jáne olardy qajetti azyq-túlik qorymen qamtamasyz etý, sondaı-aq jol boıyndaǵy sý ótkizý qubyrlaryn tazalaý jumystary aıaqtalyp qaldy,- dep habarlady Aqtóbe oblysy ákiminiń baspasóz qyzmeti.
Eske salsaq, qysta Aqtóbe oblysyndaǵy respýblıkalyq mańyzy bar joldardy «QAJservıs» kompanııasy men jóndeý jumystaryn júrgizip jatqan merdiger kútip ustaıdy. Jetkiliksiz tehnıkalardy jalǵa alýdy josparlap qoıǵan.
