Aqtóbede qar tazalaıtyn tehnıkalar jetkiliksiz

AQTÓBE. QazAqparat - Aqtóbede aýa raıy qubylmaly bolyp, merdigerler kúni-túni tazalyq jumysyn júrgizip jatyr. Qala ákimi Murat Júrebekovtiń aıtýynsha, qalada tehnıka tapshylyǵy baıqalady, dep habarlaıdy QazAqparat tilshisi.

Qala ákimi qar shyǵarý jumystaryn jýrnalıstermen birge qarap shyqty. Birqatar problemany aıtyp, sheshý joldaryn qarastyrdy.

«Men taǵaıyndalǵan boıda qalany araladym. Jumys táýlik boıy júrip jatyr. Alaıda jol qozǵalysynyń qaýipsizdigin qamtamasyz etý úshin qar tazalaýdy kúsheıtý qajet. Tehnıka, jumys kúshiniń tapshylyǵy baıqalady. Ózderińiz biletindeı, jaqynda oblys ákimi qala joldaryn qardan tazartý máselesi boıynsha úlken jıyn ótkizip, qardy jedel shyǵarý úshin iri óndiristik kásiporyndardyń, qurylys kompanııalarynyń tehnıkalaryn tartýdy tapsyrdy. Sondaı-aq Eraly Luqpanuly merdigerlik uıymdarda tehnıka men jumys kúshiniń bar-joǵyn tekserýdi kerektigi týraly tapsyrma berdi. Óıtkeni birqatar uıymdardaǵy tehnıkanyń naqty sany memlekettik satyp alý konkýrsyna qatysý kezinde málimdelgen derekterge sáıkes kelmeıdi», - dep atap ótti qala ákimi Murat Jýrebekov.

Aıta keteıik, Aqtóbede kóshelerdi táýlik boıy qardan tazartý jumystary júrgizilip jatyr. 1-5 qańtar aralyǵynda qalada 1,5 aılyq qar tústi. Jalpy Aqtóbe qalasynda joldardy qysqy kútip ustaýǵa 11 merdiger uıym jaýapty. Turaqty negizde 200-ge jýyq arnaıy tehnıka jumyldyrylǵan. Kúndiz 12 brıgada, al túnde bes brıgada jumys isteıdi. Qystyń basynan bastap polıgonǵa 23500 myń tekshe metr qar shyǵaryldy.
Eske salsaq, Murat Júrebekov 4 qańtar kúni taǵaıyndaldy.

Foto Týlemısova Kýandyka