Aqtóbede qańtar oqıǵasyna qatysqandarǵa sot úkimi shyqty

AQTÓBE. QazAqparat – Aqtóbe oblystyq qylmystyq ister jónindegi mamandandyrylǵan aýdanaralyq sotynda Qańtar oqıǵasyna qatysqan bir top kúdiktige sot úkimi oqyldy, dep habarlaıdy QazAqparat tilshisi.

Qańtar oqıǵasynan soń qozǵalǵan qylmystyq is «Jappaı tártipsizdik», «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq», «Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý» baptary boıynsha qaraldy. Jaryssóz kezinde memlekettik aıyptaýshylar kóligimen polıtsııa qyzmetkerleri men adamdardy qaqqan sottalýshyny Isaevti 15 jylǵa bas bostandyǵynan aıyrýdy surady. Keıbir sottalýshylardyń jazasyn jeńildetý qajet dep tapty.

Sot úkimimen sottalýshylar E.Ajnııazov, A.Omarov aqtaldy. Taǵylǵan aıyp boıynsha quqyqbuzýshylyq anyqtalmaı, olar sot zalynan bosap shyqty. Endi E.Ajnııazov, A.Omarov óz quqyǵyn qorǵap, zańsyz qýdalaýǵa usharaǵany úshin shaǵym túsire alady.

«N.Isaev Qylmystyq kodekstiń 370-1-baby 2-bóligi 1, 5 tarmaqtary jáne 272-baby 2-bóligi boıynsha aıypty dep tanylyp, túpkilikti 15 jylǵa bas bostandyǵynan aıyrý jazasy taǵaıyndalsyn. Jazasyn qaýipsizdigi joǵary túzetý mekemesinde ótesin. Jazasyn óteý merzimi 2022 jyldyń 9-qańtarynan bastap eseptelsin. Kóligi memleket menshigine tárkilensin. Sottalýshy D.Qamı Qylmystyq kodekstiń 272-baby 2-bóligimen aıypty dep tanylyp, 4 jylǵa bas bostandyǵynan aıyrylsyn», - dedi sýdıa Nurlan Baqtyǵalıev.

Sottalýshy D. Ábıev aıypty dep tanylyp, túpkilikti 9 aıǵa bas bostandyǵynan aıyrý jazasy taǵaıyndaldy. Jazasyn óteý merzimi qamaýǵa alǵan kúnderimen eseptelip, sot zalynan bostaldy. Dál osylaı sottalýshylar J.Esmýrzaeva, Q.Shamýratov, N.Muhıt, A.Bekeev, B.Amanǵosov aıypty dep tanylǵanymen, sot zalynan úıine jiberildi.

Al alańǵa tas tasyǵan E.Quttybaev, Q.Baımuratov aıypty dep tanylyp, 9 aıǵa shartty túrde bas bostandyǵynan shekteldi. Al eki júk kóligi tárkilendi. Sonymen birge N.Ómiráli, J.Iskakov, B,Quspanov, R.Ahmetov, A.Sadýaqasov, Á.Dáýken 9 aı probatsııalyq baqylaýda bolady.

Sot oblys ákimdigi, oblystyq polıtsııa departamenti men kúzet basqarmasynyń shyǵyndy óndirý týraly aryzyn qaraýsyz qaldyrdy. Bul azamattyq is retinde bólek qaralady.

Sot úkimi zańdy kúshine engen joq. Taraptar 15 kúnde apellıatsııalyq shaǵym túsire alady.