Aqtóbede qant pen unnyń qaby shyǵarylady
AQTÓBE. QazAqparat - Aqtóbede jylyna 6 mıllıon qant pen unnyń qaby shyǵarylady. Bul týraly oblys ákiminiń baspasóz qyzmetine silteme jasap QazAqparat habarlaıdy.
Aqtóbede «Qaptama ındýstrııasy» JShS-i jańa tsehty iske qosty. Alǵa aýdany, Bestamaq aýylyndaǵy jańa tsehta jylyna 6 mıllıon qap shyǵarylady. Qazirgi kúni qant pen unǵa, makaronǵa arnalǵan polıpropılendi qapqa suranys joǵary.
«Memleket basshysy Nursultan Nazarbaevtyń tapsyrmasyna saı oblysta kásipkerlikti damytýǵa, bıznes ahýaldy jaqsartýǵa baılanysty qajetti sharalardyń barlyǵy jasalyp jatyr. Bul sharalar bizge ekonomıkaǵa ınvestıtsııany kóbirek tartýǵa, jańa jumys oryndaryn ashýǵa jáne turǵyndardyń ál-aýqatyn arttyrýǵa jaǵdaı jasaıdy. Jańa tseh ımportty azaıtýǵa septigin tıgizedi», - dedi oblys ákimi Berdibek Saparbaev.
Jańa tseh qurylysy men qural-jabdyqqa 150 mıllıon teńge ınvestıtsııa salyndy. Ári tsehty iske qosýǵa «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda tıimdi ústemeaqymen nesıe berildi. «Qaptama ındýstrııasy» JShS dırektory Ábdilmálik Raıymbergenovtyń aıtýynsha, óndiriste otandyq shıkizat qoldanylady.
«Biz polıpropılendi Pavlodardan satyp alamyz. Daıyn ónimge tutynýshylardyń logotıpteri men emblemalaryn basyp shyǵarýǵa arnalǵan quraldar bar. Tseh birneshe kompanııamen kelisimshartqa qol qoıdy»,- dedi Á. Raıymbergenov.
Aıta keteıik, tsehta aýyldyń 20 turǵyny jumys isteıdi. Alda taǵy 30 adam jumysqa alynady.
