Aqtóbede kanadalyq tásilmen jol salǵan basqarmanyń burynǵy basshysy sottaldy
AQTÓBE. KAZINFORM - Aqtóbe oblystyq jolaýshylar kóligi jáne avtomobıl joldary basqarmasynyń burynǵy basshysy Málimbet Ibrashov sottaldy. Oǵan Qylmystyq kodekstiń «Laýazymdyq ókilettilikterdi teris paıdalaný» babymen aıyp taǵyldy.
№2 qalalyq sotynda Aqtóbe oblystyq jolaýshylar kóligi jáne avtomobıl joldary basqarmasynyń burynǵy basshysy Málimbet Ibrashovqa qatysty is qaraldy. Іs materıalyna súıensek, ol 2019 jyldyń shilde aıynda qyzmetke taǵaıyndalady.
«Nurly jol» baǵdarlamasyn iske asyrý aıasynda Aqtóbe oblysy ákimdigi ashyq konkýrs ótkizip, «Qobda-Mártók» tasjolynyń 30-52 shaqyrymy aralyǵyn jóndeýdi «Bazıs-K» JShS utyp alady. Sol kezde basqarma basshysy M.Ibrashov pen «Bazıs-K» JShS-niń basshysy ortasha jóndeý kelisimshartyna qol qoıady.
Joba quny – 649 554 835 teńge.
«Bazıs-K» JShS basshylyǵy kelisimshartqa qol qoıǵanymen, qurylys-montaj jumysyn «DosDanAı» JShS óz mindetine aldy. Kompanııa dırektory M. Esenov pen quryltaıshysy M. Manýkıan 2019-2020 jyldary aralyǵynda jumys istep, basqarma men «Bazıs-K» JShS-niń arasyna qajetti hattamany toltyryp, usynady. Hattamaǵa sol kezderi jumys istegen bólim basshysy N. Nagımetov, bas maman E. Eleýsiz, «SeısmoStroıZaşıta» kompanııasynyń tehnıkalyq baqylaýshysy Kantarbaev, ýchaske basshysy M.Esenov qol qoıyp, onda barlyq jumys, naqtylasaq 22 shaqyrym jol jóndelgeni jazylǵan.
Al shyn máninde munda 18 shaqyrym jol ǵana jóndeldi. Nátıjesinde 4 shaqyrym jerge ortasha jóndeý jumysy júrgizilmegen. Biraq akt toltyryp, jumys úshin 649 554 835 teńge aqsha aýdaryldy.
Shyn máninde 70 401 633 teńgeniń jumysy atqarylmady. Qurylys-ekonomıkalyq sot saraptamasynyń qorytyndysyna súıensek, shyǵyn kólemi - 70 401 633 teńge.
Sot otyrysy kezinde basqarma basshysy qyzmetin atqarǵan aıyptalýshy Málimbet Ibrashov kánisin moıyndamady.
- Sot úkimimen Málimbet Ibrashov Qylmystyq kodekstiń 361-baby 4-bóligi 3-tarmaǵy negizinde aıypty dep tanylyp, 3 jylǵa bas bostandyǵynan aıyrý jazasy taǵaıyndalsyn. Memlekettik qyzmette basshylyq laýazymdy atqarý quqyǵynan ómir boıyna aıyrylsyn. Jazasyn óteý orny qylmystyq atqarý júıesiniń qaýipsizdigi tómen mekemesi dep belgilensin, - dep jazylǵan sot kabınetindegi úkimde.
Sot úkimi zańdy kúshine engen joq.
Eske salsaq, Málimbet Ibrashov 2019-2021 jyldary aralyǵynda Aqtóbe oblystyq jolaýshylar kóligi jáne avtomobıl joldary basqarmasynyń basshysy boldy. Ol basshylyq etken tusta Oıyl aýdanyna kanadalyq tásilmen jol salynyp, synǵa ilikti.
