Aqtóbede qan-josa bolyp, janjaldasyp júrgen adamdar jurtty shoshytty
AQTÓBE. KAZINFORM - Aqtóbe qalasynda adamdar arasynda tóbeles bolyp, kóshede qan-josa bolyp júrgen er azamattar jurtty qorqytty. Qazirgi kezde oqıǵaǵa qatysy bar kúdiktilerdiń bári anyqtalyp, ustaldy.
Oqıǵa Aqtóbe qalasyndaǵy 8 shaǵyn aýdanda bolǵan. Vıdeodan birneshe adamnyń qan-josa bolyp júrgenin kórýge bolady. Sonymen birge birneshe polıtsııa qyzmetkeri men jedel járdem brıgadasynyń ókili bar. Alǵashynda kópke baǵynbaı, qarsylasyp júrgen adamnyń pyshaq jaraqatyn alǵan bolýy múmkin ekeni, tipti birneshe adamdy jaralaǵany týraly aqparat tarap ketti. Alaıda polıtsııa bul aqparatty joqqa shyǵardy.
- Oqıǵa týraly habarlama kelip túskennen keıin dereý polıtsııa jasaǵy jiberilip, zańsyz áreketter toqtatyldy. Oqıǵaǵa qatysýshylardyń barlyǵy anyqtalyp, polıtsııa bólimine jetkizildi. «Densaýlyqqa zııan keltirý» faktisi boıynsha qylmystyq is qozǵaldy. Qazirgi ýaqytta oqıǵanyń mán-jaıy anyqtalyp jatyr,- dep habarlady oblystyq Polıtsııa departamentiniń baspasóz qyzmeti.
Aqtóbe oblystyq densaýlyq saqtaý basqarmasynyń habarlaýynsha, jedel járdem oqıǵa ornyna 19:58-de bardy. 30 jastaǵy er adamnyń moınynda kesip-tesilgen jaraqat boldy. Ol Aqtóbe medıtsına ortalyǵynyń hırýrgııa bólimine jetkizildi. Al 39 jastaǵy er adamnyń sol jaq shyntaǵynda kesilgen jara boldy. Ony kópsalaly oblystyq aýrýhanaǵa jetkizdi.
«39 jastaǵy áıel de sol aýrýhanaǵa oń jaq qoly jaralanyp, jetkizilgenimen, jatyp em qabyldaýdan bas tartty. 32 jastaǵy taǵy bir er adamnyń erni jyrylyp, basy jaralandy. Ol ishimdik ishken»,-dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Aıta keteıik, buǵan deıin Aqtóbede balalardyń betine buryshty gaz shashqan jasóspirim ustaldy. Ol Aqtóbede kórshi Reseı elinen kelgen. Polıtsııa ony shekaradan ustady.
