Aqtóbede kámeletke tolmaǵan qyz úsh sińilisin ózi baǵyp otyr

Baqylaýsyz, qaraýsyz qalǵan balalardy otbasynyń úlken qyzy Aqerke qaraıdy, arasynda oǵan Ózbekstannan ýaqytsha kelgen ájesi Tilláhan Yrzabaeva járdem kórsetedi.

 Aqtóbe oblysyna Ózbekstannan qonys aýdanǵan Kúljumyrovtar otbasy qazir jaldamaly páterde turyp jatyr. Kishkentaı bólmede tórt qyz ben olardyń ákesi Mahmýd Kúljumyrov turyp jatyr.

«Balam Aqtóbede jumys istep, keıin osy jaqqa qonys aýdarýǵa sheshim qabyldady. Úılendi, tórt qyzy bar. Kelinim Saodat Kúljumyrova da kelip, saýda jasap, bir adamdarǵa qaryz bolyp qaldy. Saýdasy júrmedi, otbasynda daý-janjal boldy. Ol Ózbekstan azamaty bolǵan soń sol jaqta qalyp qoıdy. Sodan beri 2 jylǵa jýyq ýaqyt ótti. Qyzdar anasyn kórmedi. Kishkentaıy Janat qazir 5 jasta. Ol saǵynyshyn bildirmeıdi, bári ishten tynyp júr»,- dedi Tilláhan Kúljumyrova.

Bul oqıǵa týraly Aqtóbe qalalyq ákimdigi biledi. Tipti qalalyq Elek polıtsııa bóliminiń kámeletke tolmaǵandar isi jónindegi ınspektory, №8 orta mektepke jaýapty Gúlnur Aldanova oralman Mahmýd Kúljumyrovtyń barlyq qujattaryn jınap, Ózbekstannyń Qazaqstandaǵy elshiligine joldady.

«Biz bul otbasymen tyǵyz baılanysty jumys isteımiz. Otaǵasy Mahmýd Kúljumyrovta eki eldiń de qujaty bolmady. Ol jańa kýálik alý ýaqytyn ótkizip alyp, osy kúnge deıin tólqujatsyz júre bergen. Barlyq qajetti qujatty jınap, Ózbekstannyń Qazaqstandaǵy elshiligine jiberýge kómektestik»,- dedi Gúlnur Aldanova. Qujat 2018 jyldyń qys aılarynda daıyn bolýy tıis.

Qazirgi ýaqytta balalar jazǵy demalysta júr. Olardyń týý týraly kýáligi bar. Balalardyń bireýi ǵana Qazaqstanda, úsheýi Ózbekstanda dúnıege kelgen. Otbasynyń úlkeni, ári aqyldysy Aqerke bıyl 5 synypqa kóshti. Úzdik, alǵyr oqýshy sińlisi Ásemgúlge alǵash árip úıretip, álippeni oqytty. Esep shyǵarýdyń joldaryn túsindirip, kóbeıtý kestesin jattatty.

«Sińlilerime qaraılasyp, olardy sabaqqa daıyndaımyn. Qazirgi kezde 1 synypqa baratyn sińlim Aısulýǵa árip úıretin jatyrmyn. Ol qosý amaldaryn biledi. Áripti de tanıdy. Aldaǵy ýaqytta oǵan qamqor bolyp, sabaqqa birge daıyndalamyz. Ózim de jaqsy oqımyn. Tek orys tilin meńgerý qıynǵa soǵyp tur»,- dedi Aqerek Kúljumyrova. Ol bı bılegendi unatady. Sportqa da áýes. Al Ásemgúl gımnastıkamen shuǵyldanyp júr. Bárin ózi úırenip aldy.

Úıdiń kenjesi Janat Kúljumyrova qazir 5 kúndik balabaqshada. Bul kómekti jergilikti bılik kórsetti. Tegin balabaqshada Janat Kúljumyrov apasy Aısurýmen birge tárbıelengen bolatyn. Endi bir ózi baqshaǵa barady.

«Kishkentaıymyzdy anasy 3 jasynda tastap ketti. Bala bolǵan soń saǵynady, ákesiniń janynan qalmaıdy. Júrigimiz ezilgenimen, qoldan keler kómek joq. Ákesi Ózbekstanǵa qaıta oralǵysy kelmeıdi. Ol tórt qyzyn da ózi baǵyp-qaǵamyn dep otyr. Men de Ózbekstan azamatymyn. Aýylǵa baryp, ýaqytsha qujat merzimi bitken soń úıime baryp, kelip júrmin. Sol kezde kórshilerge nemerelerimdi amanat etip ketemin, balam qaraıdy. Bizge kómek kerek. Qyzdar mektepke barady, olarǵa arnaıy forma tiktirý kerek. Oqý quraly da joq. Kıimderin alatyn qarjy tappaı otyrmyz», - dedi otbasynyń ájesi.

Oralmandar Aqtóbege 6 jyl buryn qonys aýdardy. Qujattary rettelmegen soń olar arnaıy kvota ala almady. Qazir balalaryna da memlekettik járdemaqy tólenbeıdi.

Al Mahmýd Kúljumyrovtyń jalaqysy páteraqy men ótken jyldardyń qaryzyn óteýden aspaıdy. Kámelet jasqa tolmaǵan balalar bolsa toıyp tamaq ishpeıdi, tátti suramaıdy...