Aqtóbede kámeletke tolmaǵan qyzǵa seksýaldyq zorlyq kórsetken er adam sottaldy

AQTÓBE. KAZINFORM – Aqtóbe oblystyq qylmystyq ister jónindegi mamandandyrylǵan aýdanaralyq sotynda 25 jastaǵy sottalýshyǵa úkim oqyldy. Onyń kámelet jasqa tolmaǵan qyzǵa seksýaldyq zorlyq kórsetkeni dáleldendi.

Aqtóbe qalasynyń 25 jastaǵy turǵynyna Qylmystyq kodekstiń 121 baby 3-1 bóligi 1-tarmaǵy jáne 120-baby 3-1bóligi 1-tarmaǵy, ıaǵnı zorlaý jáne seksýaldyq sıpattaǵy zorlyq-zombylyq áreketter baby boıynsha aıyp taǵyldy. Sot sottalýshyny eki bap boıynsha da aıypty dep tanydy.

— Qylmystyq kodekstiń «Zorlaý», «Seksýaldyq sıpattaǵy zorlyq-zombylyq áreketteri» baptary boıynsha aıypty dep tanylyp, túpkilikti 16 jylǵa bas bostandyǵynan aıyrý jazasy taǵaıyndalsyn. Pedagogıka salasynda, kámeletke tolmaǵandarǵa qatysty qyzmette jumys isteý quqyǵynan ómir boıyna aıyrylsyn. Jazasyn óteý orny — qaýipsizdigi ortasha túzetý mekemesi. Jábirlenýshige 2 mln teńge moraldyq zalal óndirilsin, — dedi sýdıa Altynbek Sabyrov.

Sot jabyq ótti. Sottalýshy buǵan deıin isti bolmaǵan jáne otbasyly ekeni aıtyldy. Oqıǵa 2024 jyly qyrkúıek aıynda bolǵan. Jábirlenýshi ol kezde 15 jasta boldy. Qylmystyq oqıǵa sottalýshynyń jumys ornynda tirkeldi.

Buǵan deıin habarlaǵanymyzdaı, Aqtóbe oblystyq qylmystyq ister jónindegi mamandandyrylǵan aýdanaralyq sotynda eki sottalýshy ómir boıyna bas bostandyǵynan aıyryldy. Olar jasóspirimge seksýaldyq zorlyq kórsetip, anasyn bopsalaǵan.