Aqtóbede kámeletke tolmaǵan qyzǵa seksýaldyq zorlyq kórsetken áskerı qyzmetshi sottaldy
AQTÓBE. KAZINFORM – Sot áskerı qyzmetshini aıypty dep tanyp, 15 jyl 6 aıǵa bas bostandyǵynan aıyrdy.
QR Áskerı soty baspasóz qyzmetiniń habarlaýynsha, is jabyq qaralǵan soń barlyq aqparat qupııa saqtalady.
– Sot otyrysy jabyq ótken soń eki taraptyń da quqyǵy qorǵalady. Sol sebepti qandaı da bir aqparat taratylmaıdy. Sottalýshy 15 jyl 6 aıǵa bas bostandyǵynan aıyryldy, - dep habarlady QR Áskerı sotynyń baspasóz qyzmeti.
Aıta keteıik, is Qylmystyq kodekstiń «Zorlaý» baby boıynsha tergelip, qaraldy. Sot otyrysy Astana qalasyndaǵy áskerı sotta ótti.
Eske salsaq, Aqtóbede oqýshy qyzǵa seksýaldyq zorlyq kórsetti degen kúdikpen er adam ustaldy. Oqıǵa Hromtaý qalasynda bolǵan. 14 jastaǵy oqýshy qyzǵa azǵyndyq jasady degen kúdikpen 25 jastaǵy jigit qamaldy.
