Aqtóbede kámeletke tolmaǵan balalardy tonaǵan eki stýdent qamaýǵa alyndy

AQTÓBE. KAZINFORM — Aqtóbe qalasynda eki balany tonady degen kúdikpen 16 jastaǵy stýdentter ustaldy. Kúdiktiler jábirlenýshilerge kúsh kórsetý arqyly qorqytyp, uıaly telefondary men kúrtelerin tartyp alǵan.

Aqtóbede kámeletke tolmaǵan balalardy tonaǵan eki stýdent qamaýǵa alyndy
Foto: Aqtóbe oblystyq PD

Tergeý-tekserý kezinde oqıǵa 1 qarasha túni qaladaǵy saıabaqtardyń birinde bolǵany anyqtaldy. Polıtsııa qyzmetkerleri jedel-izdestirý sharalary barysynda olardy kóp uzamaı ustaǵan. Kúdiktilerdiń Aqtóbe qalasynyń 16 jastaǵy turǵyndary ekeni anyqtaldy. Ekeýi de jergilikti kolledjderde bilim alady.

Olar kinásin moıyndaǵan.

— Qazir atalǵan derek boıynsha sotqa deıingi tergep-tekserý júrgizilip jatyr. Kúdiktiler ýaqytsha ustaý ızolıatoryna qamaldy, — dep habarlady Polıtsııa departamenti.

Polıtsııa QR Qylmystyq kodeksiniń 191-baby 2-bóligine sáıkes, tonaý deregi boıynsha kináli dep tanylǵandarǵa múlkin tárkileýmen birge 7 jylǵa deıin bas bostandyǵynan aıyrý jazasy kózdelgenin eske saldy.

Buǵan deıin Pavlodarda 9-synyp oqýshysy ózge bireýdiń telefonyn paıdalanyp, jedel qyzmetke terrorızm aktisi daıyndalyp jatqany týraly jalǵan habar bergeni jóninde jazǵan edik.