Aqtóbede kámelet jasqa tolmaǵandar bıyl 45 qylmys jasady

AQTÓBE. KAZINFORM – Bıyl 8 aıda kámeletke tolmaǵandar 45 qylmys jasaǵan. Al olarǵa qatysty 109 qylmys tirkeldi. Bul týraly oblystyq PD bastyǵynyń birinshi orynbasary Ardana Saımaǵambetov kolledj bilim alýshylarymen kezdesýinde aıtty.

Aqtóbe oblysynda sońǵy kezderi mektep oqýshylary men kolledj bilim alýshylary arasynda tirkelgen qylmys rezonans týdyryp tur. Jańa oqý jyly bastalǵanda polıtsııa men bilim salasyna jaýaptylar birlesip, túrli kezdesý ótkizdi. 

- Jasóspirimdi qylmystyq, ákimshilik jaýapqa tartý maqsat emes. Bir balany jaýapqa tartsaq, onyń arty nege ákelip soǵatynyn 10 bala kórsek eken deımiz. 8 aıda jasy kámeletke tolmaǵandar 45 qylmys jasady. Byltyr 75 derek tirkeldi. Eki esege tómen. Alaıda bıyl tirkelgen 45 qylmysty 48 jasóspirim jasap tur. Onyń 29-y kolledj bilim alýshysy, qalǵany mektep oqýshylary. Joǵary oqý ornynyń stýdentteri joq. Temir aýdanynda bolǵan oqıǵa báriniń esinde. Aýylda jalǵyz mektep bar. Onda 245 oqýshy bilim alady. 9, 10, 11 synypta 38 oqýshy oqıdy. Onyń 20-y qyz. Sonda 18 ul qalyp tur. Basy bir aýylǵa syımaı jatyr,- dedi oblystyq PD bastyǵynyń birinshi orynbasary Ardana Saımaǵambetov.

Onyń aıtýynsha, buryn esepte turǵan balalar qylmys jasaıtyn. Kóbine áleýmettik jaǵdaıy tómen, tolyq emes otbasy balalary bolǵan. Qazir laýazymdy tulǵalardyń da balalary zań talaptaryn buzady. 

- Jas kámeletke tolmaǵandarǵa qatysty 109 qylmys tirkeldi. Bul uryp-soǵý, tartyp alý derekteri. Taıaýda kolledjdiń 2-kýrs stýdenti 50 myń teńgeni bopsalap alǵan. Qylmystyq kodekstiń «Qorqytyp alý» babymen is qozǵalyp, tergeý júrip jatyr. Kúdikti qamaldy,- dedi Ardana Saımaǵambetov.

Aıta keteıik, bıyl 50 bala úıinen ketip qalǵan. Olardyń 20-y ata-anasynan urysyp qalǵan, 5-i sabaqqa qatysqysy kelmegen. Al qalǵany óz betimen ómir súrgisi keletinin aıtqan. 

- Oblystaǵy barlyq mektepte, sonymen birge tehnıkalyq-kásiptik kolledjde ata-analardy qoldaý ortalyǵy ashyldy. Jan ahýaly psıhologııalyq ortalyǵy da jumysyn bastady. Balalarymyzdyń arasyndaǵy psıhoemotsıonaldyq turaqsyzdyq, kúızeliske tez berilý, álimjettik kórsetý, býllıngtiń bárinde psıhologııalyq máselelerdiń bar ekeni belgili. Ortalyqta psıhologtar, ádiskerler jumys isteıdi. Oqýshylarǵa, muǵalimderge, ata-anaǵa keńes beredi,- dedi oblystyq bilim basqarmasy basshysynyń orynbasary Dına Jamanbaeva. 

Eske salsaq, 2 qyrkúıek kúni Temir aýdany Qopa aýylynda oqýshylar tóbelesip, bireýi kóz jumdy. Qazir qylmystyq is boıynsha 3 oqýshy qamaldy.