Aqtóbede qalanyń 148 jyldyǵyna oraı marafon uıymdastyryldy

Aqtóbe qalasynyń 148 jyldyǵyna oraı búgin «Seniń marafonyń - seniń jeńisiń!» atty marafon ótti. Oblys ákimdiginiń aldyna jınalǵan qala turǵyndary 21, 10 jáne 3 shaqyrym qashyqtyqty baǵyndyrdy. Kóbi jastar. Arasynda uzaq jyl boıy sportpen shuǵyldanyp júrgen ardagerler de bar.

«Bul kúnge aldyn-ala daıyndalyp, jattyǵý jasaǵan edik. Jattyqtyrýshylardyń eńbegi esh ketken joq. 10 shaqyrymdyq qashyqtyqty birinshi bolyp baǵyndyrdym. Demalys kúnimiz óte sátti ótti ári densaýlyqqa paıdaly. Bıyl birinshi ret qatysyp otyrmyn. Keler jyly bul úrdisti jalǵastyramyz»,- dedi marafonshy Ǵabıt Qyzaev.

Salaýatty ómir saltyn qalyptastyrýǵa arnalǵan sporttyq sharaǵa qala ákimi Іlııas Ispanov, oblys ákiminiń orynbasary Asqar Bıahmetov qatysyp, ekeýi de úsh shaqyrymdy júgirip ótti. Sonymen qatar múmkindigi shekteýli jandar da 3 shaqyrymdyq qashyqtyqty baǵyndyrdy.

«Densaýlyǵy myqty adam ǵana el bolashaǵy bola alady. Biz búgin marafonǵa oqýshylardy alyp keldik. Olar jappaı júgirýge shyǵyp, ózderiniń myqty ekenin dáleldedi. Jastardyń sporttyq sharalarǵa qatysyp, qaladaǵy qoǵamdyq jumystarda belsendilik tanytýy bizdiń uıymshyldyǵymyzdy kórsetedi. Ári búgin Aqtóbeniń 148 jyldyǵy toılanyp jatyr. Jeńisimizdi qalamyzǵa arnaımyz»,- dedi №13 orta mektep dırektory Asqar Kúshtaev.

Aıta keteıik, marafonǵa 5 myńnan astam adam qatysty. Eń kishkentaıy 10 jasta, al úlkeni 82 jasta.

«10 shaqyrymdyq qashyqtyqty 350 adam baǵyndyrsa, 21 shaqyrym qashyqtyqty 116 adam júgirip ótti. Marafonshylardy 14-35, 36-49 jáne 50 jastan joǵary dep bólip, marapattaldy. Jappaı júgirýge arbaǵa tańylǵan eki adam qatysty. Ekeýi de úsh shaqyrym qashyqtyqty baǵyndyrdy. Týa bitti sal aýrýyna shaldyqqan marafonshy Almas 10 shaqyrym qashyqtyqty baǵyndyrdy. Olar jeke marapattalyp, marafonshflarǵa alǵys hattar tapsyryldy»,- dedi qalalyq dene shynyqtyrý jáne sport bóliminiń basshysy Evgenıı Goncharov.