Aqtóbede qalalyq aýrýhana qyzmetkerleri mınıstrlikke shaǵym túsirdi
AQTÓBE. KAZINFORM – Qarǵaly qalalyq aýrýhanasynyń qyzmetkerleri kadrlyq ózgerister men emdeý ornyndaǵy qysymdy aıtyp, QR Densaýlyq saqtaý mınıstrligine aryz túsirdi. Qazir arnaıy komıssııa qurylyp, tekserý júrip jatyr.
Aqtóbe qalasynda ornalasqan Qarǵaly aýrýhanasynda taıaýda bas dáriger ózgerdi. Arada eki aı ótkende ujym qyzmetkerleri shaǵym túsirdi. Olar aryzdy QR Densaýlyq saqtaý mınıstrine jazǵan.
– Jańa basshy kelgennen beri ujym ishinde turaqsyzdyq, senimsizdik jáne psıhologııalyq qysym kúsheıe tústi. Bas dáriger ózine jaqyn adamdardan «komanda» jasaqtaý maqsatynda bilikti, tájirıbeli mamandarǵa túrli qysym kórsetip, olardy ornyn bosatýǵa májbúrlep otyr. Olardyń ornyna óziniń týystary men jaqyndaryn taǵaıyndap jatyr, - dep shaǵymdanǵan.
Aryzda orynbasary retinde aýyldasy ári dosyn, zańgerdiń ornyna burynǵy jumys ornyndaǵy qyzmetkerdi, bas medbıkeniń ornyna týysyn taǵaıyndaǵanyn jazǵan.
– Qazirgi kezde arnaıy jumys toby qurylyp, komıssııa qarap jatyr. Tekserý jumystary aıaqtalǵannan keıin istiń mán-jaıy bilgeli bolady, - dedi oblystyq densaýlyq saqtaý basqarmasynyń baspasóz qyzmeti.
Aıta keteıik, elimizde alǵashqy medıtsınalyq kómektiń jańa modeli engizildi. Ózgeris boıynsha endi emhanalarda meıirgerler de naýqas qabyldaı alady. Pılottyq joba alǵash ret byltyr qyrkúıek aıynda Elordadaǵy № 5 qalalyq emhanasynda júzege asa bastady.