Aqtóbede qala ishindegi marshrýttardy sýbsıdııalaýǵa 10 mlrd teńge jumsalady
AQTÓBE. KAZINFORM — Qala ishinde barlyǵy 46 baǵyt bar. Sonymen birge aýdanaralyq baǵyttarǵa 700 mln teńgege jýyq qarjy bólindi.
Aqtóbe oblysy aýmaǵyndaǵy tasymaldaý jumystary ákimdikte ótken jıynda talqylandy. Sonyń ishinde sýbsıdııa máselesi qaraldy.
— Aýdanaralyq avtobýs baǵyttary 14 baǵytta qyzmet kórsetedi. Olardyń qatarynda Temirbek Júrgenov, Mártók, Badamsha, Oıyl jáne Qobda baǵyttary bar. Tasymaldaýdy bir negizgi operator jáne 7 jeke kompanııa júzege asyrady. Baǵyttarǵa kún saıyn 47 avtobýs shyǵady, onyń 31-i jańa kólik. 2025 jyly bul baǵyttardy qoldaýǵa 611,7 mln teńge bólinse, 2026 jyly qarjylandyrý kólemi 698,7 mln teńgege deıin ulǵaıtyldy. Al Aqtóbe qalasynda 46 baǵyt boıynsha jolaýshylar tasymalyn 6 kompanııa qamtamasyz etedi. Kún saıyn jelige 355 avtobýs shyǵady. Bıyl qalalyq tasymaldardy sýbsıdııalaýǵa 10,3 mlrd teńge qarastyrylǵan. Sońǵy úsh jylda 242 avtobýs satyp alynyp, avtoparkti jańartý deńgeıi 85% jetti. Bıyl taǵy 141 avtobýs satyp alý josparlanǵan, — dep habarlady Aqtóbe oblysy ákiminiń baspasóz qyzmeti.
Qalalyq, aýdanaralyq qatynastan ózge halyqaralyq baǵyttar da bar. Qazirgi kezde Aqtóbeden Reseıdiń Orynbor, Samara, Orsk jáne Ýfa qalalaryna avtobýs qatynaıdy. Jazda Qyzylorda men Atyraý baǵyttary boıynsha avtobýs tasymaly iske qosylady.
Aıta keteıik, Aqtóbede qoǵamdyq kólikterge dabyl túımesi qondyrylyp jatyr. Shuǵyl shaqyrtý tússe polıtsııa avtobýstyń qaı baǵytta ketip bara jatqanyn anyqtaıdy. Keıin eń jaqyn polıtsııa jasaǵy barady.
